Ula d tazrigt n useggas-agi, ur tettilli ara deg ttiɛad alamma d tazwara n useggas amaynut i d-iteddun. Ula d tin n useggas yezrin, tella-d deg waggur n furar n useggas-a.
Imi deg yiseggasen yezrin tettili-d ddima deg taggara n waggur n duǧember n yal aseggas, acu kan seg useggas iɛeddan beddlen-as azemz yimsuddsen-ines. Tuɣal-d tfaska tadelsant taɣelnawt n usaru amaziɣ deg tezrigt-is tis mrawet d ṣat (17), i yetturaǧun ad tili d tajmilt i ucennay ameqqran Djamel Allam, yemmmuten ass n 15 cutember iɛeddan. Ɛlaḥsab n wulɣu i d aɣ-d-yewwḍen seg tnebdat (commissarie) n tfaska-agi, ad tili deg tazwara n useggas-agi i d-iteddun. Yetturaǧu ad yili deg wahil n tezrigt-agi tis 17, aṭas n leqdicat idelsanen ara d-yilin, gar usenɛet n yisura, isaragen ɣef ssinima, timsikniyin, isikwan…atg.
Tiɣri n uttekki i yimsizzewren
Am wakken i d-iberreḥ unebdad n tfaska-agi Mass Farid Mahiaout s wazemz n 30 unbir 2018, ara d-yilin ass aneggaru n usersi n yisura ara yettekkin deg temsizzelt n useggas-agi. Iger-d dɣa, tiɣri n uttekki i yimsuffɣen akked yimseḍruyen n yisura s tutlayt n tmaziɣt i wakken ad jerden isura-nsen uqbel 20 deg waggur i d-iteddun deg Uxxam n yidles Mulud Mɛemmeri n Tizi Uzzu. D asiher adelsan ameqqran ideg yetturaǧu, ad tili temsizzelt deg taggayin-agi n yisura: Asugen n ssinima (Asaru awezzlan d uɣezzfan), Asugen asliẓri (tividyutin d téléfilm), Asaru n temkaḍuft (animation) d win n usider (Documentarie).
9 n warrazen i tezrigt-agi tis 17
Yetturaǧu seg tezrigt-agi tamaynut n 2018, ad tefreq teseqqamut n uktazal 08 n warrazen n tzemmurt n wureɣ, ma d wis 09 ad yili d arraz n yimferǧen. Arrazen-agi n tzemmurt n wureɣ, ad d-ilin akka: Yiwen i usebgar, wayeḍ i tsebgart. Yiwen i usaru aɣezzfan wayeḍ i usaru awezzlan. Yiwen i ssenf n usider wayeḍ i ssenf n temkaḍuft, ɣer tama n winna n yimferǧen. Awi yufan ad ttwaferqen akk warrazen-agi, imi ilindi ur yuttunefk ara winna n tzemmurt n wureɣ i usaru aɣezzfan. Arrazen-agi i tmanya n tzemmurt n wureɣ, ad ten-tefk teseqqamut n ufran, ma d arraz-agi n yimferǧen d nutni ara t-yextiren s udber (vote) deg wussan n temsizzelt.
Adaoun A.