Di zzman n yiɣil, asmi ttnaɣen leɛrac d tudrin, di taddart n Tala-Ixlan deg lεarc n At Aysi, yella yiwen n udrum ssawalen-as At Waḍu. Qqaren fell-asen, d at ufud. Segmi ara d-kkren d imenɣi d yiderma niḍen, ladɣa d yiwen n udrum isan ula d nutni irgazen n at yiɣil. Yiwen wass, deg wussan n ḥartadem teffeɣ yiwet n teslit n udrum ittqamaren adrum n At Waḍu ɣer tala, ad d-tagem tacmuxt tamezwarut, ass n seba n wussan seg d-tedda (ass n seba yam). Tislit tcebbaḥ, tesbur tabniqt i uqerru ines, teddem asagem, tewwi abrid n tala akked d tlawin n udrum-is. Iṭij iḥma, ifures tagnit ad as-tiniḍ d anebdu, lɣaci ffɣen akk ɣer lecɣel-nsen. Akken izgen wass, igenni iɣli-d ɣef tmurt. Ssayqa seg yigenni tayeḍ si lqaɛa. Aḍu ittsuḍu-d d izumal, iqelleε ula d iqermuden n tnezduɣin. Tislit iffɣen ad d-tagem mazal-itt deg ubrid, ula d nettat ur temniɛ ara. Isuffeg-as waḍu tabniqt-is, iwwi-tt akin, tεelli deg yigenni. Tislit, aqerru eryan, tsetḥa, tḥar deg yiman-is. Tilawin-nni i iddan yid-s sekkrent laeyaḍ ssawalent qqarent: Ikkes-as waḍu tabniqt i teslit! Ikkes-as waḍu tabniqt i teslit! Alammi kra n lɣaci fehmen belli d yiwen seg udrum n At Waḍu i ikksen tabniqt i teslit. Tuɣ lḥal, adrum n At Waḍu d udrum n teslit ɣur-sen taedawt. Lexbar yewweḍ imawlen: yiwen n uɛeggal seg udrum n At Waḍu, ikkes sser fell-asen. Irgazen n udrum n teslit qqnent wallen-nsen seg wurrif, refden lemkaḥel, ffɣen ad d-erren ttar. Akka i ikker imenɣi gar udrum n teslit d udrum n At Waḍu. Gren-d iman-nsen iderma niḍen, rnan-d imrabḍen n At Lḥaǧ, usan-d fran-ten. Qqaren, lemmer ur d-uzilen ara ɣur-sen, yilli msengaren. Kkren amek ara asen-ggen! Nnan-asen: “taddart-a yessefk ad tt-teǧǧem imi ur terbiḥem ara fell-as. Ad tesbeddem taddart niḍen ukessar ihin, deg umalu, deg wakal n At Lḥaǧ”. Imezdaɣ uɣen-asen awal, ssbedden taddart niḍen di tama-nni i asen d-nnan slid adrum n At Waḍu. Qqaren-d wigi ruḥen si taddart, guǧǧan anda niḍen. Akka i trab taddart n Tala-Ixlan.
Ramdane LASHEB