Aṭas n yimdanen i iḥemmlen ad aɣen idgan icebḥen u ad kksen ɣef lxaṭer. Ḥemmlen ad ḥewwsen d tigruma n yimeddukkal neɣ d tiwaculin, ladɣa taggara n yimalas akken ad ttun taẓayt n yixeddim si tama, ma si tayeḍ, ad kksen ɣef wul s thuski d sser i tekseb tmurt. Deg Wehran, aṭas n yimukan icebḥen i yellan, yal yiwen yettawi amur-is n yimdanen d yiḥewwasen. Maca, akken iḥemmlen yimdanen-a, ad ssezrin lewqat-nsen di tsussmi d liseɛ, akken i ten-id-ttqaraɛen yigezzamen n yiberdan di ṭṭiq. D ayen i iḍerrun deg Ukurnic Awehrani, imi ɣas d adeg yetɛeddan di ccbaḥa s tmuɣli d tizegzewt n yilel i t-id-iqublen, i d-yetwelhen ɣer din, maca aṭas n liḥalat n utɛeddi i d-ibanen ttnernayent dinna u ssexsarent deg wazal n umkan-nni. Ɣer sbiṭer Meǧber Tami n Ɛin Tturk i d-yettili usiweḍ n wid yenṭerren, ssebbat n wayagi d atɛeddi i d-yettilin fell-asen s usexdem n yemrigen imellalen (lemwas d yijenwiyen ladɣa). Ttegrayen-d, syin akkin, deg tesga n tezwiriyin tisejjayin tigfusanin (les urgences médicales et chirurgicales). Deg waggur kan, ḍrant-d azal n 210 n twuɣa yecban tigi, d ssrabes d yixeddamen n Uḥuddu aɣarim i ten-id-yessukksen akken ad yili useḥbiber ɣef tezmert-nsen. Ma d timental timeqqranin i yeǧǧan ḍerrunt-d tedyanin-a, d akken Akurnic-a d abrid ur ttawin ara waṭas n medden, acku yeggugi ɣef tmezduɣin d temdinin, rnu ulac din ula d yiwen n uxxam n ssrabes n laman. Ɣef waya i furṣen tagnit yibandiyen-a akken ad gen leqdic-nsen s ttawil war tugdi. D ayen i d-nufa ttcektayen fell-as yimdanen yettaɣen abrid-a, ilaq ad tili tullya n uxxam n laman di tama-ya, akken lewḥuc-agi n yiberdan, ad nnejlin syin, ma d imsebriden ad d-ters deg wul-nsen teflest.
Khaled. A