Ǧeɛfer At Wecrif d udem gar wudmawen iɣef ara cfun aṭas n yilemẓiyen n tsuta n wass-a. Ilul di taddart n At Saleḥ, taɣiwant n Buzgan, deg useggas n 1959. Ɣas ulamma yeggujjel d amecṭuḥ, leḥnana i yettawi deg wul-is d taḍsa i izedɣen deg wudem-is, nuḥen deg yidammen-is, rnu yugem-d ddeqs seg-sen seg ugama d temsirin n tudert. Di tmedyazt, yewwi-d abrid si temẓi-s. Skud iḥemmel aẓawan, asmi i t-tuɣ deg uɣerbaz, yella yesmeḥsis i kra n yinaẓuren iqburen, am Sliman Ɛazem, Ayt Mengellat d Ferḥat Imaziɣen Imula. Imir-nni, akken i aɣ-d-yenna, iɛerreḍ ula d netta ad yettseggim imeslayen akken ad ten-id-yerr d asefru. Armi d ass ideg i d-yesnulfa ḥawla n yisefra ɣef ddeqs n tlufa. Yessaweḍ dɣa yufrar-d deg waṭas n tfaskiwin di temẓi-s. D acu, ayen yerzan asufeɣ n yisefra-s deg udlis, teḍra-s akken teḍra i umedyaz Ben Muḥemmed. Imi ayen akk yessefra ar tura, a-t-an ires deg texzant. S tjawaqt-is, icebbeḥ Dda Ǧeɛfer yal rreḥba iɣer yerza, s yimesli-nni aḥlawan i d-yettawi. Am wakken i yella i yidis n buhan n yinaẓuren icennayen n temnaḍt-nsen d tiyeḍ. Seg usefru d tjawaqt, iɛedda Dda Ǧeɛfer ɣer tugna akken deg-s ad ifares tayri i yesɛa i ugama d tewlaft, deg-s ad yefk afus d tegnit i yilemẓiyen i d-yettnekkaren s tikci daxel-nsen. Ur yurǧi ara tastaɣt i d-yewwi seg uselmed akken ad ikessel war ma iga kra, wanag yekker akked tkamirat yebda deg usenfar-ines n tallelt d tuṭṭfa n wakud. Ayendin dɣa d ilemẓi neɣ d tilemẓit, d amedyaz neɣ d acennay, iwumi iga tavidyut am usaru akken ad t-yessissen i uzayez. S umata, yal mi ara yeg timlilit akked urgaz, neɣ d tameṭṭut, yesrusuy-d tavidyut-nni di internet. Ɣas ma mačči aṭas segmi yekcem amaḍal n tugna, imi yella ilaq-as ttawil d wallalen i tt-yeṭṭafaren, wanag iga Dda Ǧeɛfer ar tura ccɣel iɣef yuklal tinemmirin.
M. K.