Yuγal yesγam-itt-id γef yirebbi-s, syin yeddem-d aγanim-is akken ad ikemmel tira, netta akken ul-is yettfeggiḍ d lfeṛḥ akked ussirem.
Yeqqel iluεa-tt s nnecṛaḥa :
– Amek akken a Dasin sda-nni-nneγ ?
Tenna-yas:
Kečč ssefru
Nekk ad iniγ
Neγ kečc ini
Nekk ad ssefruγ
– Amek, amek ! Ad iniγ kemm ad tessefruḍ ! Ur tettneḥcameḍ ara, teḥṛem ar…
Mi as-yerra akka, tεedda tεawed-as-d :
Ur ssefruy
Ur d-qqaṛeγ
Ur d-qqaṛ
Ur ssefruyeγ
Maca kečč aru
Ma d nekk ad γṛeγ
Mi as-yesla akka, yenna-yas : « Ala, nekk ad aruγ ma d kemm efk-iyi-d tiktiwin i tdehneḍ s yiḥururen-inem, akken agdud ad yeqqaṛ tirawin-inu s rreγb ». Imiren, tger-as iγallen, ma d netta yessers aγanim yellan deg ufus-is, ṛuḥen di tnafa n tirga.
Ur kfin ara unag-nsen di tirga n ussirem mi ten-id yessaki usḥedwi n ubriq yersen γef yiri n ṭṭaq n txelwit n Muḥend. D abriq n ttay d aqdim ! Awi yeẓṛan ansi t-id-yejmeε ? Buh γef Muḥend meskin bu yijeqḍuṛen ! Seg zik-is netta akka ; iḥemmel ad yejmeε tiγawsiwin tiqdimin : Ta n setti-s, ta n jeddi-s, ta n lgerra-nni, ta n zzman n yiγil, ta…
Abriq yersen γef yiri n ṭṭaq, yejmeε-it d rriḥa n setti-s, nettat yakan asmi i tella di lḥayat-is tεudd-it ger tγawsiwin εzizen fell-as, imi d amγar-is i t-id-yewwin seg Mekka asmi akken iṛuḥ γer lḥiğ.
* D tullist i yura Mokrane Chikhi, tewwi araz amezwaru
di temzizelt n tsekla « Boujie d’or » n useggas 2010