Yenna unaẓuṛ deg yiwet n tezlatin-is : « Ass-agi lliɣ azekka wissen », neɣ s unamek-nniḍen yiwen deg-neɣ ur yeḍmin tudert, imi akken i d-qqaṛen lejdud-nneɣ, tamettant tezga d tili n umdan seg tlalit-is, armi d tamettant-is. Dɣa, yiwen n wass ad teglu s bab-is. Ass n, 16 maggu yezrin, yeḍṛa yiwen n usehwu deg ubrid yellan gar Ḥasi Mesεud akked Tugurt, ṛuḥen kṛaḍ n yimestulen (iǧadermiyen) d iseflan-is. Ineggura-a, llan teddun ɣer ccɣel-nsen, lameεna akken yeqqaṛ yinzi iteddu waḍu akken ur as-yehwi i uɣeṛṛabu.
Imi deg ubrid-nsen, teṭṭerḍeq ṛṛuḍa n tkeṛṛust-nsen, dɣa teffeɣ-asen seg ufus, imir-n i teneqqlab. Takerrust-a, llan deg-s kṛaḍ n yimestulen, gar-asen Mass L. Sawli seg tɣiwant n Tizi n Brahem, tawilayt n Ṣṭif, i yesεan kan 28 n yiseggasen di leεmeṛ-is. Aqcic-a, yella iḥemmel medden aṭaṣ, imi yettwassen s terbiyya d teḥdeq-is, yettqadaṛ ameqqṛan d umectuḥ. D ayen i yeǧǧan tamettant-is tezlez imawlan-is d yimeddukkal-is d kra win i t-iḥemmlen. Rnu ɣer waya, sḥassfen nezzeh imi mazal-it meẓẓi, yeǧǧan-asen-d lweḥc d ameqqṛan. Ma d nekni seg tama-nneɣ, nessaram-as talwit i yiɣsan-is.
K. K.