Tigrat-a, ayen akken i d-nḥel s lḥif d lmerta yuɣal d awal i s-tturaren kra akken n yimdanen. Mačči d wid yellan seg zik mgal tamsalt n tmaziɣt, maca d…arraw-is. Ass-a, di kra n tseddawiyin nneɣ,; mi ara yerzu yiwen ɣer din, ad t-id-steqsin wiyaḍ,; ama d inelmaden neɣ di tuget d iɛessasen ɣef tebburt d acu i d ssebba n tirza-s. Awal yuzzlen deg yimawen d wa: » Etudiant » neɣ d tamaziɣt i teqqareḍ ? D leɛǧeb iwumi nsell ! Ah, lukan ad d-yekker Mammeri neɣ Haroun, ad ẓren acu iḍerrun ɣef wayen iɣef mmuten? D acu kan, ur d-ǧǧin yimezwura ayen ara yinin yineggura. Yak d Lwennas i d-yennan: » Win i s-yennan tamaziɣt tefna, d win yeččan ayen ur d-iḥel ara. » Neɣ ahat deg tezlit nniḍen, yenna: » Tameslayt i d-yefrurin di sseḥ,; bɣan-tt kan i ccḍeḥ. » Necfa yakan zik-nni, ladɣa di Tizi, aniwi i yetteḍḥin s turagt I ttheggin. . Ass-a, yeqqel uqelmun s iḍarren, wid yeqqaren tamaziɣt qqlen mačči d « les étudiants ». Am wakken turagt n tmaziɣt ur tesɛi ara azal gar wallen n yimdanen. D acu kan, tameslayt i tt-iḥerzen d imawlan-is, i tt-yettruẓun d imawlan-is. Asmi akken tella tarwa n leḥlal, s zzux i d-ttbegginen yiman-nsen yimeɣnasen n tmaziɣt. Ass-a, ur ilaq ara ɣef yuɣen abrid n nnif ad brun i ṭṭbel deg waman, ad ǧǧen ameslay yecban wa ad yaɣ aẓar di tmetti, acku d ayen ara d-yeglun s wayen iɣef ur nerǧi i tutlayt nneɣ. Yak iweṣṣa fell-as Lounis, mi d-yenna: » Zik wa ihedder-itt i wayeḍ,; ass-a di lkaɣeḍ,; ad tt-id-afen yineggura. »
M. Smail