Ageffur i iɛeddan ussan-a ineggura iɣḍel-d yiwet n rrehba ɣef yimezdaɣ n Beclul. Imi, d tiḥemmal i yetturugen deg yiberdan, zdat n tḥuna, deffir n yixxamen…Lǧar ur iteffeɣ ɣer wayeḍ ! D acu kan, tikkelt-a, ur d-telli ara lexṣara tameqrant, imi kra kan n yimekwan i wwḍen waman ɣer daxel n tḥuna, maca abrid aɣelnaw wis 5 yergel acḥal d tasaɛet.
Iwulem ad d-nesmekti belli deg useggas n 1998, dɣa di lawan-a n taggara n lexrif i d-tejba yiwet n tḥemmalt i d-yesseglan s lexsara tameqrant. Ass-nni, ula d tamacint tunef seg ubrid-is, s kra n wid i d-yeddan deg-s rwan lmerta amek ara fɣen seg lɣerqa i ten-id-iqublen. Acḥal d taḥanut i iraben, d yixxamen iɣer kecmen waman ! Di tallit-nni, ssutren yimezdaɣ seg yimḍebbren iwakken ad jerden tamnaḍt-a d tin meḍruren, maca tiɣri nsen teɣli deg umezzuɣ n uɛeẓẓug. D ayen yeǧǧan acḥal d amdan ur t-id-tṣaḥ ara kra n tedrimt ara t-iɛawnen ad issebded taḥanut neɣ ahat ad yili win ara d-iɣermen meqqar ayen i as-ixesren deg uxxam. Deg useggas n 2003, tekker-d akken yiwet n tejmaɛt i yettazzalen ɣef yizerfan n yimezdaɣ n Beclul ? Tessaweḍ tesqamut-a ad temlil d waṭas n yimḍebbren n twilayt anda i ssutren dɣa yiwet n tedrimt i wid meḍruren. Maca, ɣef leḥsab n kra n yiɛeggalen n tejmaɛt-a, ayen i mmeslayen yeqqim deg unnar n uṛggem, ur yefri wugur-a.
Tikkelt-a, d ayen i qrib yeḍrin. D acu kan, imezdaɣ n Beclul url lin d wid ara yessusmen i lḥif yecban wa, imi d tudert nsen d tin n warraw nsen i yellan di yimi n wuccay.
Sylia. M