Ass N lexmis 13 tuber γef 07 n tmeddit, tella-d deg tesnawit n Corbusier – 44 rue Léopold Réchossière yiwet n temlilit d yilmeẓyen akked yimezdaγ n temnaḍt n Aubervilliers, anda i d-snubgen mass Gilles Manceron, d amazray u d aselway wis sin n Tiddukla n Yizarfan n Umdan, Hassan Remaoun, d amazray deg tesdawit n Wehran d mass Mouloud Aounit, Aselway n tiddukla 93 deg wul n tegduda. Syen yella-d ccna akked terbeεt n Barbès, Nassima Chaabane (tacennayt n ṣṣenf andalus) d usenεet n yiwen n usaru, d tajmilt i yuγalen i yiminigen izzayriyen akked tedyanin n 17 tuber 1961.
Ma yella d asebḥit n wass-a 17 tuber 2011, ad d-tili deg tqenṭert n tegmat « Passerelle de la Fraternité » tarusi n yiwet n tmuqint n yijeğğigen.
Tiddukla « 93 deg wul n tegduda » tebγa ad d-tesmekti tidyanin n 17 tuber 1961, anda, fransa texdem yiwet n tmecret meqqren, marren yidammen n yizzayriyen.
Ass n 17 ṭuber 1961, d luluf n yimesbaniyen, fγen-d γer yiberdan, suγen mgal taεessast yesbed yimḍebber amenzu n yimsulta « Maurice Papan ». Ugar n 200 n yimesbaniyen ttwanγan, ttwaḍegren deg wasif n « La Seine » sγur iγallen n laman n Maurice Papan.
Ayen yeḍran di tlemmast n « Paris » d ayen ur iqebbel wallaγ n umdan . Γef waya, Tiddukla 93 deg wul n tegduda, tessutur akken ad yesteɛref udabu n tmurt n Fransa s wudem unṣib γef tedyanin n 17 tuber 1961, am wakken ilaq ad jerden tidyanin n 17 tuber 1961 deg umezruy, aya s tikci n yittafsaren iqburen n umezruy.
Islam Bessaci