Kra ttemyuzzament Faṭima d Dasin, Muḥend ibedd am lmeṣnu&epsilon,; yesmexẓir kan deg-sent, awal ur t-id-yuli. Γas ulamma Dasin tettak-d ṭṭiyat n tayri seg wallen-is, Faṭima tettmuqul-it s tmuγli n leḥnana, amzun akken iγaḍ-itt, tuγal tenṭeq γer Dasin : Mačči i kemm i wumi xedmeγ ccan, maca γef wudem n Muḥend ur nuhwan ara ad yeqqim akka deg uεewwiq, atan ad wen-d-sbegneγ lbeṛhan-iw. Tura kan ad kecmeγ γer ubriq ideg zedγeγ azal n rbeεṭac n leqṛun aya ! Ad kkeγ ixef-is ansi akken d-ffγe&gamma,; i wakken ad tissinem azal-iw akked lqedṛa-w iyi-d-yekkan s-γur Bab n Yigenwan.
Dasin yeẓṛan i wumi tettheyyi , mazal-itt testeεmil am wakken ur tumin ara. Imiren tennejbad Faṭima, di tasint tuγal d abu. Tebda imir tkeččem s leεqel deg yixef n ubriq ansi i d-teffeγ. Dasin yesεan aγawas din din teddem-d tadwayt-nni n ssmax yersen γef ṭṭabla, tesmar-as-tt akk γer daxel, tin tettsuγγu. Tuγal daγen teddem-d aγanim i yes-s yettaru Muḥend tessed-it deg yixef n ubriq-nni. Tin mazal tettεeyyiḍ, Dasin werεad ur as-teqqid ara yerna tugad ad d-teffe&gamma,; tεedda tettel abriq-nni amcum di tferret-nni n uglim ideg yettaru Muḥend, tcudd-it s lxiḍ i d-tegzem seg-s s tuγmas-is i qrib qelεent-d. Imir teddem tezzehlell-it seg ṭṭaq, teṣbeḥ-it-id deg yiγẓer iḥemlen sdaw n lḥaṛa. Tettfeṛṛiǧ deg-s i tziri amek tturaren yes-s waman akked yiẓṛa, tin tettsuγγu deg-s am ṛεud wis kan amek ur as-d slin ara wat taddart i yellan ṛuḥen di tnafa n yiḍes.
* D tullist i yura Mokrane Chikhi, tewwi araz amezwaru
di temzizelt n tsekla « Boujie d’or » n useggas 2010