Segmi i tebda tegrewla n 17 fuṛaṛ di Libya, timnaḍin timazγawalin ladγa Zewwaṛa d Udrar Ineffusen llant-d d timezwura γer umennuγ mgal iγallen n udiktatur Mεemmeṛ Lqeddafi i yurzen fell-asen azaglu i wazal n 42 n yiseggasen. D igrewliwen n temnaḍin-a i yesseγlin tamanaγt Tṛables, rnu γur-s timnaḍin-a ttwaḥuzan-t s waṭas s sebba n yimenγan qessiḥen yeḍṛan deg-sent kra kkan wussan n tegrewla. Ayen yellan d zyada γer yigrewliwen n temnaḍin-a timazγawalin, d asebgen n laṣel, n tmagit tamaziγt, tin ideg ttayalen akk yilibiyen, maca wid iεemṛen tajmaεt n CNT(Asqamu Aγelnaw Uεḍil n Libya) zzin-d s weεrur i tidet yeṣfan am waman, γas ma ula d agdud alibi icuk deg-sen, imi kra kan n waguren γer deffir, llan d nutni i d ifassen iss ten-yekkat umehbul n Lqeddafi, ahat d netta i cwi fell-asen, acku netta yehbel meskin, yak nutni deg lεaqul-nsen i llan ! Deg agur n tuber yezrin, imazγawalen n Libya nhewwalen mi slan i yinaw n Mustapha Abdeljelil, aselway n CNT ideg d-yenna: « Leḥkem di Libya ad yili s uṭebbeq n ccṛeε n lislam », yebγa ad yerr agdud alibi aḥṛuṛ γer tallit talemmast, ma d tugdut d yizerfan ideg tella tmaziγt, ur as-d-usin ara γer lbal-is, acku ur yessin ara azal-nsen netta i d-iṛebba umehbul n Lqeddafi. Deg udiwenni i tegga La Dépêche de Kabylie akked mass Fethi Benkhelifa ameγnas n tmaziγt di Libya, daγen d aselway n Ugraw Amaḍlan Amaziγ(CMA), adiwenni i d-yeffγen deg ass n 26 tuber yezrin, mass Fethi Benkhlifa yenna deg awal-is γef temsalt-a n unkaṛ n CNT i tmagit(tumast) tamaziγ: « Di tazwara d nekni i iεemden ur nebγi ara ad nger tamsalt-a n tmagit γer unnar n uskasi, acku necγel d umennuγ ilmend n uslelli n Libya, maca tura d lawan akken ad nefser kulci γef ṭṭabla, d lmuḥal ad nesṭeεeṛef neγ ad nexdem akked wid i yugin ad qeblen tamagit tamaziγt,
ur nqebbel ara ad teḍṛu yid-neγ tin yeḍṛan yakan d watmaten-nneγ imazγawalen n Lezzayer d Lmeṛṛuk, nekni newjed akken ad nexdem akk ayen yellan deg yifassen-nneγ akken ad as-d-nerr azal i tmaziγt di Libya ». Ayen i d-yenna mass Benkhlifa ur yessaged ara iεeggalen n CNT, i yugin ad d-inin ar tura awal-nsen γef umkan ara tesεu tmaziγt di tmurt-is, Libya tatrart γas ma imezdaγ n temnaḍin timazγawalin yecban Adrar Ineffusen d Zewwaṛa,
ggulen ur ḥniten, akken tamaziγt ad taγ amkan i as-ilaqen bγan wat CNT neγ ugin. Ass-nni kan n 24 unbir, Asqamu n Temnaḍt n Zewwara, yessufeγ-d yiwen n wulγu ideg d-yewwet seg meḥyaf i ixeddem CNT γef temnaḍin timazγawalin, asqamu-ya ibeggen-d atixxeṛ-is seg tejmaεt n CNT alamma yuγal-as-d wazal i tmaziγt. Mebla ccek takayt-a i ukin γef zik watmaten imazγawalen n Libya, d ayen ara as-d-yerren azal-is i tmagit tamaziγt ama bγan ama ugin yiεdawen-is, imi mazal ḥman yidammen yerna mazal uzzal ger yifassen-nsen.
Mokrane Chikhi