Ddeqs deg-naɣ ur t-nessin ara almi d asmi yemmut, xas nella neqqar di tesdawit, xas nella seg wat Tizi, qlilit wussan deg-i nesla s yisem-is, deg wussan n tesdawit. Ala Crif i wumi d-cfiɣ yekseb kra i d-yessufeɣ d tikasiḍin, maci menwala ad tent-isɛu, ala win iḥemmlen tisuqas n Muḥya yemmalen tidet zeddigen am lekfen ɣef yiman-is, ɣef wid-is, ɣef medden merra. Tikwal tezgel-aɣ tmusni akken i tt-nezgal ula d nekni. Ula d netta, tamurt ur s-d-terri ara tis ɛecra n wayen i s-yefka: “Anef i zzher ad yesserwet, ur nelli d widen yeččḥen, timura n medden ak yiwet, nek snat i y-id-iṣaḥen”. Di tmura n medden, yessaked akin i tmurt n leqbayel, akin i teqbaylit, kra yellan d tamusni, kra yellan d idles am wagi-nneɣ, kra n temsal yerḥan medden akken i ɣ-rḥant, ileqqem-iten s tira d tririt-nnsent ɣer tagi-nneɣ amer ahat ad aɣ-d-iban webrid yettawin…Abrid yettawin, di lanjiri??? Lanjiri yetthabin tisuqas n Muḥya, qerriḥit, win tent-iɛerden am win yessikiden ɣer lemri i s-yemmalen leɛyub ɛebban iseggasen ɣef tuyat-is. Lanjiri i s-iqemmḍen ṣṣut di rradyu d tilibizyu, imi, imi ara d-yenṭeq d isaffen n tidet i d-iḥemmlen, ttawin kra yellan d ayennat ur nessin acu i d taqbaylit, ur terḥi teqbaylit, ur nettnadi ɣef teqbaylit.. Imi ara d-ḥemmlen ttawin kra din d ixnanasen yeswan tidi n at wakal d idammen, si zik n zik ttabaɛen ulaaaaaaac!!! Xas akken di lmut-is i d-ilul ɣer waṭas n yeqbayliyen, xas akken nqubel-it s ijeǧǧigen imellalen asmi i d-yuɣal ɣer tmurt, ass-a, ayen yura d wayen yenna, ad yili d isegmi n leḥlu ara yemɣin di merra tamiwin n tmurt akken tent-yezraɛ, ad mɣint d amezgun, d asefru, d ayen qqaren medden, d ayen d-nnan s tagi-nneɣ, akken ad mazal lxir ar zat…
Zira