Amenzu n yennayer 2962 d win i d-yellan di taddart n yilyiten, taɣiwant n Saharidj, s yiwen n wudem yessefraḥen, imi mmugren-t yimdanen s leɛwayed n tjaddit yebnan ɣef tegmat d tdukli.
Kra n wussan uqbel ttiɛad, kra n yilmeẓyen mwaten ad heggin yiwet n tmeɣra i useggas amaynut amaziɣ. Rray i fernen ur iɛeṭṭel ara iwakken ad yaɣ aẓar, ayen yeǧǧan acḥal d amezdaɣ ifka-d afus n tallelt. Ass n lexmis yezrin, tettwahegga-d yiwet n lwaɛda yesdukklen iɛeggalen, usan-d ula d wid izedɣen berra i taddart. Ilmeẓyen-a, gren-d di lbal-nsen asnubget n wid ara d-yernun aɛeqqa n tisent i tmeɣra. D aselway n tɣiwant n Saharidj, Mass Ali Belkacemi i d-yewḍen d amezwaru ɣer taddart iwakken ad d-yini : « Ad rreɣ tajmilt tameqrant i wid akk i d-iheggan aya, imi tirrugza tettas-d s tuṭṭfa di tnaṣlit. » S yen yus-a unemhal n Rradyu n Tubiret d sin seg wid ixeddmen yid-s, anda mmeslayen yilmeẓyen d yimɣaren ɣef yinsayen n umager n useggas amaynut. Mačči drus n yinebgawen i yellan, imi usan-d wiyaḍ yettilin deg yiḥricen yemgaraden.
Am wakken i tella di leɛwayed n yimezdaɣ n taddart-a, imekli s seksu d uyaziḍ teṭṭafar-it ddaɛwa n lxir, d asfillet i wayen akk yelhan ara iḥazen ama d imezdaɣ ama d tamurt s timmad-is i d-qqaren yimɣaren s yiwen n ṣṣut ḥlawen.
Akka, s lferḥ i tekfa tmeɣra n usfukel s yennayer deg Yilyiten s usirem ɣer temliliyin yecban tagi.
S.M