Yiwen gar yiɣeblan igejdanen i mazal yecɣel imezdaɣ n tɣiwanin n ugerzu n Tizi-Uzzu, d aɣbel n lexṣas n usafar n uyefki n tcekkart deg tḥuna, i iḥuzan aṭas n tɣiwanin n ugerzu, ladɣa tiɣiwanin n unẓul n ugerzu, ad nebdar gar-asent, taɣiwant n Lemɛatqa, Ssuq l Tniyen, Amecras, Tizi n Ttlata, Iwaḍiyen, Ait buwaddu…atg.
Tuɣal tcekkart n uyefki d amerẓi n yal ass. Ttkubrin yimezdaɣ sdat n tḥuna seg mi ara d tefrari tafat, deg tezrarin ur nkeffu ara ɣef tcekkart neɣ snat n uyefki, ula d wid yesnuzun ayefki, semrasen kra n tarrayin yeffɣen i usaḍuf, dayen i d-yessekkaren lɣiḍ n yimdanen, anda ad naf asemres n tiɣin n uyefki n tcekkart d tmerna n tiɣin n uyefki n tfunast (testan) yettnuzun s ssuma n 50 ɣer 80 n yidinaren i litra neɣ tiɣin n usafar-nniḍen n luzinat n uyefki. Imsedellal (commerçants) n uyefki iwumi ttunefken ttesriḥat n usnuzu n uyefki yesɛan tallelt n uwanek, tikwal ttawin-d asafar-agi yiwen neɣ sin n wussan kan deg ddurt. Sdat n warway n ufraq n uyefki, imḍebbren n uḥric n tenzzuyt, sfehmen-d aya. Mass Ahcene Belhadji imeḍebber i d-yelhan s ussudes n ssuq d usali n tdamsa deg tmehla n Tenzzuyt n ugerzu n Tizi-Uzzu, yenna-d deg wawal-is ‘’ Ssebba n warway i d-yellan deg ufraq n uyefki d lexṣas-is deg tḥuna, d asenqes deg umur n uyefki afrur (poudre) i as d-yettunefken seg Umaris (office) aɣelnaw i ugerzu Tizi-Uzzu’’. Yuɣal-d deg wawal daɣen ɣef warway deg ufraq n uyefki, anda i d-iwwked d akken srabes-ines hegan-d yakk leblanat iwatan i ṭmana n ufraq yelhan usafar-agi agejdan n twaculin. Dɣa yefka-d yiwet n tmentalt i d-uixelqen lexṣas n uyefki deg ssuq, d aseqdec n usafar-agi deg leqhawi. Dɣa srabes n tenzzuyt hegan-d yiwen n usaḍuf ara iḥetmen ɣef yimɛelmen n leqhawi ad sqedcen isufar n uyefki-nniḍen. Ad d-nesmekti kan d akken deg ugerzu n tizi-Uzzu llant (4) rebɛa n luzinat n uyefki n imdanen usligen ( privés), dima ɣef leḥsab n Mass Belhadji, agerzu n Tizi-Uzzu yettsaḥit-id umur n 1213 n tunn n uyefki abrur yal agur, rebɛa n luzinat n uyefki sufuɣent-d azal n 498 500 n litrat n uyefki yal ass, wid iferqen asafar-agi, ha-ten-in deg umḍan n 135 y id-sen.
Ali Zalouk