‘’lukan d ay nettkil kan γef tγiwant n Tizi Wezzu tili acemma ur yettwaxdim ass-a. Cwi kan llan yimdanen n taddart i yewwi lḥir γef uγerbaz-nsen, dγa εawnen-d swayen zemren : ama s tedrimt ama s ttawilat-nniḍen.’’ Akka i aγ-d-yenna M. OUKACHA, aselway n tiddukla n yimawlan n yinelmaden n uγerbaz amenzu ‘’Atmaten MOULA’’ n taddart n Tala Σetman. Aγerbaz-a, γef wakken i d-yenna ha-t-an di yir liḥala : stehzan deg-s armi d ulamek. ‘’ Di lakul-a, tella lemḍerra d tameqqran, arraw-nneγ zemren ad helken si lewsex, zemren ad ttwaεeggben si yir liḥala n yimekwan anda leεben, neγ εad anda akken qqaren. Daymi i d-nekker, ihi, iwakken ad nwali amek ara nqabel taswiεt-a. Nwala amek myezwaren lecγal, nebda nekni s timmad-nneγ. Neẓra lukan ad nettkel γef dduwla weḥdes, ‘’ruḥ ar taεacurt ad d-yeww uḥeddur ad teččeḍ…’’ akken qqaren. Ihi, nerra tiγri i yimezdaγ n taddart, ladγa wid-nni yesεan ttawilat, rran-d i teγri akken iwulem lḥal. Nεawed i waman d trisiti, nebna ṣsur, nesbeγ tiwwura d leḥyuḍ, nhudd tizeγwin-nni n zik n leqraya…atg. Mazal isenfaren-nniḍen akka γer sdat…’’ ikemmel yenna-d uselway n tiddukla-a.
Mbeεd imi ibeddel uselway n tesqamut n taddart, d nnuba n tiddukla n yimawlan n yinelmaden, ula d nutni beddlen iεeggalen-is. Amur ameqqran n yiεeggalen n tdukliyin-agi d ilmeẓyen u d wid yeγran. Nessaram kan ur fecclen ara di leqdic-nsen imi aṭas n yisenfaren i ten-yettrağun, aṭas n lexṣas i tesεa taddart n Tala Athmane γef wakken i aγ-d-nnan.
Hocine. M