I tikkelt tamezwarut i ddren yimezdaɣ n twilayt n Bgayet liḥala yecban tagi. Adfel, asemmiḍ d lqella n ttawilat. Akken kan i d-yessaweḍ udfel ɣer temnaḍin irkelli n temdint n yemma Gouraya, yekker uhetwir deg yimdanen, imi liḥala d tin iwumi ur zmiren ara ad qablen.
Aṭas n yimezdaɣ i d-selken yiǧadarmiyen seg lmut, imi deg Tizi Lexmis, sebɛa twaculin i d-srewlen mbeɛd mi tezzi fell-asen teswiɛt. Aya yeḍra-d s usyax i iḥuzan ixxamen-nsen. Di Melbu, daɣ kra n yixxamen ssawḍen ad ɣlin s lketra n udfel i yennejmaɛen ɣef sqef-nsen.
Nnig taluft n yiberdan ireglen, imezdaɣ n temnaḍin n Bgayet qublen aɣbel n lixsas n lgaz d uyefki. D ayen yessawḍen imdanen qessden tafejrit imukan anda i yettnuz, tikwal ttrajun din ass merra, tikwal ttuɣalen-d s yifassen d ilmawen.
Ula d tawilayt-a ur teslik ara si taluft n leqraya, imi nnig n ɛecra wussan-aya ur ɣrin yinelmaden, d ayen ur nessishil ara taluft n uɣram n temsirin.
S. M