Tennulfa-d iseggasen-a ineggura yiwet n tjara tamaynut i yuɣen aẓar deg waṭas n tudrin n Tmurt n Yiqbayliyen; ta d asenzi n yiɣiɣden i d-yettaǧǧa wayen yettwaserɣen. Deg tɣiwant n Ayt Smaɛel, i yeggugen s wazal n 65 n yikilumitren ɣer usamar n Bgayet, yuɣal warmud-a iḥuza akk imdanen d yakk tiḥricin n tmetti. D aẓawali neɣ d amerkanti, d agrud neɣ d ilemẓi, d tameṭṭut neɣ d argaz, merra-nsen, gren deg-s akken ad asen-d-uɣalen yidrimen send asenzi n tneɣda-nni i wid i d-irezzun beddemma ɣer tuddar akken ad tt-aɣen. Ɣas ahat yal amdur (leɛmer) issemras tjara-a, maca d tilawin akked yigerdan i yezgan deg-s ɣef teɣzi n umalas.
D tilawin, acku d nutenti i yessewwayen tal taɣawsa deg ukanun n uxxam, ma d igerdan, llan rezzun beddemma ɣer teẓgi akken ad d-ḥerqen isɣaren d kra n yimɣan, am tidekt. Ma yella zik tuɣ ur sɛin azal yiɣiɣden armi teddun deg yiḍumman, ass-a deg wussan caḍen wid iẓerren deg-sen agerruj meskud ayen i asen-ggaren d adrim i wayyur yettɛawan-iten ad sgerrzen addad-nsen n tudert n yal ass. Imi tikwal ,llan wid yesnuzuyen s wugar n 2 000 n yidinaren i wayyur. Ma d ssuma n yiɣiɣden-nni, tettbeddil ɣef leḥsab n tɣara-nsen. Amedya, iɣiɣden iɣef tseɣleb tebrek, xeddmen 20 armi d 40 n yidinaren i ukilu.
Ma yella d wid yesfan, ttnuzun 60 armi d 100 n yidinaren/akilu. Mi ara d-yerzu s tkerrust-is win i ten-yettaɣen, ad tafeḍ yal amezdaɣ acu i as-yessumur d ayen akken i d-yejmeɛ. « Yelha mi nufa ɣer wanda ara nerr iɣiɣden-nneɣ, rnu s uxelles. Ddurt iɛeddan i senzeɣ kra n wayen i d-ḥewwzeɣ deg yiculliḍen s wazal n 600 n yidinaren », i aɣ-d-tenna yiwet n tmeṭṭut seg Ayt Smaɛel.
M. K.