Tadayṛa n Yiderginen, seg tid ikessben idigan icebḥen nezzeh deg twilayt n Bgayet, amedya d aceṛcur n Kefrida akked win n Umazzer. Rnu ɣer wigi, amkan iwumu qqaṛen Amḍiq n uẓebbuc, dɣa deg-s, tzad thuski. Imi tazeggzuyt n yimɣan d ttjuṛ, tjebbed tamuɣli n umdan s tduli-s taṛbiεit. Mabla ma nettu asif n waman i yettuɣalen d lemri n ccbaḥa n temnaḍt-nni, ladɣa ma terna-d fell-as tafat n tafukt. Lameεna, ayagi yakk, ur as-fkin ara yimḍebbṛen n tdayṛa d tɣiwant n Yiderginen azal imi rran-t d amkan n udeggeṛ n uhicuṛ, εedmen isem n ugama deg-s . Ad d-nesmekti d akken, ula d asif n Uɣeṛyun ur yeslik ara.
Acku ayen akk yettenḍeggaṛen deg Umḍiq n uzebbuc, ijemmeε-it wasif n Uɣeryun. Aneggaru-a, yuɣal d asif n umuṛej d uhicuṛ n lmaεeṣrat. « Ayen yessewhamen ugar, d amek i εemmden yimasayen n twennaḍt n twilayt n Bgayet i uxessar yecban wagi, di lawan anda i zemmren ad terren d adeg i tmerrit ». D awal n yiwen n umezdaɣ seg tɣiwant n Yiderginen. Seg tama-nniḍen, asif n Uɣeṛyun, yeṣṣawaḍ aman i yilel n Ssuq Letnin. S unamek wayeḍ, d amahi d ameqqṛan iɣef nettmeslay.
Ama i twennaḍt, i yimdanen neɣ i tilmas (espèces) i yettidiren deg yilel. Rnu ɣer waya, d anebdu i d-iteddun, ihi d tazmert n yimdanen i yellan deg urar. Di taggara, yewwi-d ad d-nebder belli, imezdaɣ n tɣiwanin n Yidergiben akked Ssuq Letnin, zgan d acekti, ahat ad d-sslen yimḍebbṛen n tɣiwanin-nsen, ad frun aɣbel n ugudu.
K. K.