Mi ara twaliḍ tamγart-agi taqbaylit di liḥala am ta, amek ur tgezzem ara tasa-k, kečč yellan di lḥamu, sdat n tilibizyu d tawacult-ik. Ama ‘’rrezg n win ihenna wul-is, yusa-t-id nadam yeṭṭes’’. Tamurt n Leqbayel di twaγit, tarwa-s γef wayeg tettkel ad d-rren zaεma tiqit, wid-nni i d-ibedden d iqerra n tγiwanin neγ Lwilayat, ass-a yal yiwen anda yexmet.
Ass-a yal wa anda yessiẓin. Llan εad wid yefγen tamurt. ‘’Ahya ddin uqabac’’ akken i as-yenna winna. Anda-tt tirrrugza, anda tella teqbaylit di ‘’Lezzayer n yiseγ’’?! Nenna nezmer ad d-necbu leğnas: llan wid yeγran; wid yessnen amek teddunt temsal; wid zik yettgallan jmaεliman asmi sseḥsaben uqbel ad ttwaḥasben. Nenna yella lgaz d trisiti i usemmiḍ n cetwa, aγrum ad d-yeffeγ si lkuca, meεna nettu aya akk laqen-as wid ara ten-yesselḥuyen, nettu dakken d imdanen i yettbeddilen taswiεt s ttawilat-agi, mačči d ttawilat i yettbeddilen imdanen. Ihi teḍra yid-neγ am tgerfa asmi tebγa ad teḥfeḍ tikli n tsekkurt ur tezmir ara, mi truḥ ad d-tuγal γer tikli-s, tettu-tt, dγa teqqel tettneggiz. Neγ akken i as-yenna Fellag : ‘’asmi teffeγ Fransa si Lezzayer ur aγ-d-tiğği ara le mode d’emploi.’’ Nettu isγaren, nettu timizart, nettu tiwizi, nettu tiγezza, nettu tacemlit, Nettu d atmaten wa γer wa, nettu, nettu…’’neğğa-tt deg wafrasen’’
Asteqsi i aγ-iceγben d wa : amek llan kra n yimukan anda i d-sufγen ttawilat yerẓan asalu, ma d tamiwin-nniḍen am win yettrajun Rebbi? La aman, la trisiti, ulac ula d lmakla. Ttwaεezzlen weḥd-sen. Γef wakken i d-yewweḍ lexbar, tella lmuta di tuddart n Leqbayel, ur zmiren ara ad qablen taswiεt s yifassen d ilmawen. Σlaḥsab n APW, yal taγiwant tesεa ma ulac maḍi snat n tmacinin swayes ara fersen iberdan seg udfel.
Akken yebγu yili lḥal, mazal ciṭ n tfenṭazit γer kra n yimdanen di tuddart n Leqbayel. Yal win yesεan tamacint n yiman-is, yeffeγ-d ad yefres abrid. Yal win yesεan tafunast, yefreq ayefki-s γef lğiran asebber bnadem laẓ-is. Yal win yesεan asγar yefreq-it d wiyaḍ. Akka i as-d-tewwi ad tili tmurt n Leqbayel. Meεna, ‘’ay asyax deg-s yersen’’. Llan kra fursen tagnit-a i wakken ad ten-tesserbeḥ: ṣsawḍen taqerεet n lgaz γer 1OOO yidinaren neγ ugar, wammag lxeḍra ula d-yini umdan! Ṭtfet-aneγ i yugar aya! Nessaram kan taswiεt n wass-a, ad tili d tamsirt i uzekka.
Hocine.M