Nnan at zik s izik aẓar ijebbed ɣer tara, nebla aẓar ur tgem tara, ulama tegreḍ-t deg waman, acku ayen ɣef i tebded tilin ur yelli-ara. D alammi ɣas akken nekk-ad seg yiwen, maca tameddurt terra-aɣ ɣef waṭas, amzun akken ur d nekki seg-yiwen.
Aya d ayen ara ad d-naf yurez ɣer tikli n yal yiwen.ama deg yiman-is ɣer yiman-is, neɣ deg yiman-is ger wiyaḍ, yal yiwen d tudert.
Tudert d amezruy, amezruy d ayen ara d afen wid ara d-yasen ɣef wid i
Ruḥen ama d iseɣ neɣ d aywah, ama d lewqam naɣ d tizelgi, ama d awali neɣ d tiderɣelt, dɣa yal yiwet tettağğa-d ticraḍ ttɣamant-d i wiyaḍ ma nezmer ad-nini d assaɣ ger wid i ruḥen d wid i d-yessawḍen. tilin ur tezmir ara ad tili i win wer neẓri iḍelli-s d acu-t, yal kra s kra, kra ur d ittili mebla kra .akken tebɣuḍ tiliḍ anida tebɣuḍ tawḍeḍ kečč d kečč, ɣas tebɣiḍ ad tuɣaleḍ d wayeḍ naγ wayeḍ ira ad d yuɣal d kečč ur yezmir ara ulamma nezmer ad nemlili deg aṭas n temsal, maca amgired yella, ad yili.
Deg yimi ɣer tmeẓẓuɣt
Awal yuɣal d tira.
Tajmaɛt, d tuzya i lkanun
D aɣerbaz war tiwwura
Arrac lemden, llaẓ tettun-t
Timucuha d tisura.
Tamezgunt-a tella d tamɛayt i d ttawin yemɣaren, nekk ddem-γ-d deg-s aẓar srewseɣ-d deg-s tikta timaynutin,s wudem nniḍen, erriɣ-d ayen akken yeffren ɣef tmuɣli, rniɣ ugmeɣ-d ayen si yessefsiɣ kra n tyerrusin s wesqirreb n temsal ɣer tillawt.
akka i tḍerru d wungif alamma yuɣal-d uqerru-s deg uɣrab i yettxemmim ad yerr aḍar ihi ini-t-iyi-d ili-t yid-i deg wegni n tilawt…tekkfa deɛwessu
Tekkfa deɛwessu
Tekkfa deɛwessu : Tella d tamɛayt i d-ğğan yimezwura ttettruḥu deg yimi ɣer Tmeẓẓuɣt, tettmeslay-d ɣef yiwen ugdud yettidiren ddaw n tgelda n yiwen ugellid.
Tekkfa deɛwessu: Tettmeslay-d ɣef wacu i iḍerrun d wid akken i yemsefhamen akken ur ttemsefhamen ara. assen ara teṛṛez txelxalt yessazzalen assaɣen izeddin gar umdan d yiman-is akk gar yimdanen…alamma newweḍ ar yigduden, ɣas akken amdan s wallaγ-is, s tikta-s yella wanida i as-iɣelli yimru, yettuɣal ɣer wanida akken ur as-d-tewwi ad yili.
Taɣennant, d tferɣi slalayent-d deg-s tissas ar tmenqas tid i t-yessarwalen ɣer sdat, i t-yettarran am usafu deg lkanun, ireqq yettaẓ ar zdat, yir taggara.
Tekkfa deɛwessu: D tuɣalin ɣer ubrid, d tidet-nni i yettɣillin yimdanen meḍlen-
tt, tin i d ilulen anisa kken ur tt-ɣillen, yiwen wass kan ad d-tlal.
Tekkfa deɛwessu: Tettmeslay-d ɣef yizri yellufḍan, yerkan, yuɣalen d aqerru
amek yekkat ad yesmundel tiṭ n usmekti ɣef wid rẓan-t ccḥani, d tismin icemten i yeẓẓan tiferɣi i d-ttɣelliten s nnuba
Tekkfa deɛwessu: D timilit n umdan d yiman-is, d tiwḍin ar yiwen n usineḍ
belli deɛwessu: ur telli d aṭṭan neɣ d tin n Rebbi. Yessefk kan amdan ad immeslay d gma-s akken ara yemmeslay d yiman-is. Ad yefhem itran amek i d ttɛassan ɣef wid ak yelhan tezdeɣ nniya
Kra ur yerfid wayla-s
Taggara-ines d lqella
S kra ur nerfid ayla-s
Taggara-ines d dlala
Ayla ma ur iban wayla-s
D ifettil melba lfetla
Asekkir 1
– Asayes 1
Di Tejamaɛt
Yendeh uberreḥ At Taddart la d ttawḍen, awal yezzi ger-asen, ttemseqsayen ɣef tmentilt n uberreḥ
Yiwen: D acu i d aberreḥ-a?
Wis sin: (Am win ur d nuki) Anida ẓriɣ! Am kečč am nekk
Wis tlata: Ih ur ttayes-t ara ayen yellan ad d-iban
Asayes 2
Ataya yessaweḍ-d ugellid ɣer tama-s sin iserdasen yiwen yezwar wayeḍ yeggra d lewzir d yiqeddacen-is aserdas amenzu yetteg-d abrid i ugellid, At taddart, agellid, lewzir, iserdasen Agellid s ufella udekkan
Lewzir: Azul fell-awen ay at taddart. Akken teẓram
agellid a meɛzuz ameɛzuzan, ur yezmir ara ad
issuk afus s nnig-wen, yal tamsalt ara s-d-yasen s aqerru yezga yessekki-iyi-ken-id,deg yimani-s yeqqar: yewwi-d ad d-ciwreɣ, d ayemmi i awen-d-ssawel, atan ɣer-wen ugellid ameɛzuz ameɛzuzan.
(Agellid iwehha i umecḥuḍ)
Akli Outamazirt Yettkemmil…