Akken i t-ncedha i nennecham seg-s makka tḍul tirz-as fell-aɣ, iɛeṭṭel almi messus, zik irezzu-d fell-aɣ am inebgi-nni n yiwen wass, d afessas, nessedmaɛ yis-s tamuɣli, neqqar-as nwala-t xersum yiwen wass, tikelt-a nerja-t ad iruḥ, yewwet nneḥ amzun akken yettu belli d inebgi i yella, yuɣal d amessas am waman-nni i d-itekken ddaw ṭṭjur n uṣefṣaf, tissit ad ten-tesweḍ, fad ur itekkes, i terriḍ ar daxel ay ul! Wissen ilemẓi-nni n Micli i tečča Tizi n wedfel ma ad naru isem-is s wedfel am wakken nura isem imeɣrasen n tefsut taberkant s idammen? Wissen tazeqqa-nni nnsen n waddal ma ad as-nales lebni, ad twennaɣ, ur tettrab deg yiwen wass? Wissen arrac n C.E.M. n Ugusim deg Yillulen n Umalu ma ad ten-id-tqabel Tizi n umenṭar si llakul ɣer wayeḍ makka irab llakul-nnsen? Ma tella kra n leqraya is en-d-yeqqimen? Wissen arrac n llakul ma yella kra ara d-ṭṭfen makka ara uɣalen ɣer leqraya, yak dayen ttun aqrab-nni yerẓan tuyat-nnsen xas ulamma beddlen-t s tbutayin n lgaz d tcekkarin n wewren? Ttun kullec, mmektan-d tiyita d turart s tkurin, mmektan-d taduyt n txeftin i yefrax terẓa Tizi n wedfel, mmektan-d aseḥmu s yirrij n tmes, tafat n tcemmaɛt i win i d-tṣaḥ, rriḥa n lgaz imi ara yessew turin, mmektan-d tuga, tafunast n igujilen i rehnen tenza. Tizi n wedfel,” rrwaḥ truḥ, yyaw meqqar ad necḍaḥ” akken i tt-xedmen imezdaɣ n taddart n At Waɛban, tečča-ten Tizi, kkren xedmen tiwizi, wwin-d ak ayen i ten-ixuṣṣen, kksen-as adfel i bracma, rran-tt i ccna d ccḍaḥ, yak rrwaḥ truḥ a Zeddek Mulud, anef-asen meqqar ad ceḍḥen! I umeznaz-nni n uyefki ,deg Yillulen, yerran iman-is yeḥrec, yenwa deg yiwen wass ad yerbeḥ ma ismed-d adrim a teḥraymit, ma yezzenz tacekkart n uyefki s 30da neɣ s 35da, neɣ wid-nni yezzenzen lbaṭaṭa s 75da, d tidet tuɛar temɛict di Lezzayer tamannaɣt, dinna iban, xeddmen tettali ṭṭlaba, i wedrar, ɛni akka kan ara tdum? Akka kan ara tettemlil lqaɛa d igenni? Tizi ad tɛeddi, attaya tayeḍ yugaren tagi, awi-d ukan ad as-naf ixef-is, ma nellez, ma necɛef, ass-nni ad d-tezzi ssaɛa, mulac “ur yeɛqil ḥedd axṣim-is», gar-aneɣ kan ara tettezzi, yis-naɣ kan ara trab akken tt-nbennu, wa ad tt-yadi, wayeḍ ad tt-iqareɛ ma yella wacu ara teṭṭef tqellaɛt-nni. Kul tikelt win ara ɣ-yerzen. Tizi n wedfel am tefsut tamellalt, tira-s s rruḥ, s tikti, s yiles, s tsusmi, s tilla, s tnekra, s facebook. Tir-as ad d-tini kra, s imesdurar n Tizi n wass-a.
Zira