Ilmend n tefranin n 10 maggu i d-iteddun, Berbère-TV teldi tiwwura-s i yikabaren n tsertit. S kra n wid i d-yerzan ɣer Kamel Tarwiḥt wwin-d tikta ɣef wamek ara qablen asihar-a n tefranin. Maca, inebgi n wass n larebɛa yezrin yessewhem kra n win i as-yeslan.
Di tazwara, yugi ad d-yebder amecwar n uselway n ukabar n AHD 54, d acu kan yuɣal-d ɣur-s di taggara iwakken ad d-yini : « Fawzi Rebbaɛin d amenzu i iruḥen isers tameqqunt n yijeǧǧigen di lemqam n Ccahid di tmaneɣt iwakken ad t-awin ɣer lḥebs. » Ur yeǧǧi wid i d-yessawlen ɣer leqḍeɛ n tefranin, wala wid yeṭṭfen leḥkem di temdinin almi yewweḍ s anda yessewham. S yisem n umeɣnas n AHD 54, yewwet mačči drus di lemyur wala wid n yejmaɛt n twilayt ladɣa wid n Tizi Ouzou imi ur ssawḍen ara ad frun iɣeblan n yimezdaɣ. Din dɣa ur yezmir ara ad yessemgired gar wid yefren ugdud d wid yessebded udabu. Yessexleḍ akk timsal iwakken ad d-yebru i waya : « Limer d lebɣi, di Tizi, ur ttilin ara yikabaren. Amussu n leɛrac d win kan i ilaqen ad yesseddu timsal n temnaḍt, imi d netta i yeẓran iɣeblan n yiqbayliyen. »
Wissen ahat wid yellan ass-a di tɣiwanin neɣ di tejmaɣt n twilayt d adabu i ten-id-yewwin seg temdinin-nniḍen, neɣ balak ddeɛmumcent wallen-nsen ur ttwalin ara iɣeblan n tudrin.
Lḥasun, d lewhayem ! akabar yugin ad ilin ikabaren, ɛeql-itt, neɣ bibb-itt.
S. M