Asfel nni am win yessenγalen aman deg waman. Tgiḍ asfel i tira, wa yeγra-t wa yennejla, wissen kan ma d timezliwt i tezliḍ buberrak neγ d tiwkilin umi tefkid rray? Tira-nni ur nelli aqerru wala teseṭṭa….deg-s yexleḍ uzabuq n tayri d imeṭṭawen n tlelli. yerreẓ usalu ar tikti imi turiḍ ; Yal ajerriḍ d tamusni. Ass-nni, di temdint n Lyun, di Faffa; Ur s-tenniḍ ara anwa ara t-yaγen anwa ara t-yeγren wedlis ageswaḥ i tmesleḍ s yeγmi n talaγt d tizzegzewt n yiferrawen n tneqlin. Telsiḍ lemḍella, tekkiḍ-d si tmazirt, tenna yemma : “ Wagi d « Rracid At Musa » yura-d aṛumu s teqbayit »», temmeγ tsellem fellas tenna as: “tagi d yelli tamenzut” , nekk sseḍḥaγ; Ur mmden ara 18 iseggasen di lεemer-iw.
D Faffa i ssneγ d amenzu axaṭer yenza di taddart , wiss ma wwḍen imir εecra n yemdanen i t-yeγran?….ulamma uγent-id akk! …Mi t-γriγ ḥulfaγ win i t-yuran d Aqbayli am Yeqbayliyen nniḍen, ur yelli wayen i t-yessemxallafen netta d yemyura n yidelsan nniḍen am Proust neγ Faulkner neγ Abumaḍi neγ Maiakoγsky, amzun akken yettmeslay d yiman-is….
Tusnakt ur tečči ara allaγ-is ulamma yessen-itt inγed-itt. Ur yezgil kra yellan d asalas n yedles ; Yettader-d ssya ar da timura n Imaziγen am win icaren sani la tetteddu temsalt.
Ayen yemger Mulud Mɛemmeri neγ Ferɛun ma Atan tura temsalt :tura nuγal akk d iγenjawen, mi yeṭṭef yiwen seg-neγ kra, dγa ala win. A wi s-yennan neγ ahat yeẓra. Ṣṣaba teǧǧa-d tayeḍ. Ula d tamawayt neγ timawit-nni umi tgiḍ amkan di Rradyu telsa tazibba n tatrert : tenniḍ-as ayen akka ? wi i d-yennan tira ad teg asergel i wayen yellan yal ass id-ne&gamma,; yuγ tasga deg tidmiwin-nneγ? Ihi uzgan-d am iqermuden, wa yers af wa….Asfel-nni ččiγ waqil cwiṭ deg-s ass-nni deg yi-tefkiḍ tabexsist n tsenṭit : γriγ ayen tessaffed n wawalen yedda weclim. Tura aqli ttinige&gamma,; ttuγaleγ-d am wakken gan wudmawen-nni n wungalen-inek. Acu, ttuγalen-d xas ur d-ttasen ara.Iqqar-awen umencuf s waakki « kunwi s wigi yeγran » arut netta izra yiwen urekti i ken-imeslen axater ur d-teqqim ara kan ar tira…Taqbaylit-nni macci d awal kan. Qim kan ihi id-ne&gamma,; taswin-nneγ mazal leqqaqit.
Nacira Abrous, Aix-en-Provence 2012