Tirza ɣer at smaɛil, amager n wussan n tefsut s tmedyazt, timlilit n imedyazen deg wedrar n fad , kulci din yecbeḥ am cbaḥa n wedrar-nni i yḥudden fell-asen , adrar-nni yettfeggiḍen d tamedyazt am taliwin itekksen fad n cctawi qessiḥen yeggunin imesdurar. Ɛecra n iseggasen, d nutni d acqirrew, tamaziɣt deg wul, asefru deg yiles, kulci d asayes! Tamedyazt ɣer-sen d amennuɣ akken ad yidir yidles ad yidir yiles; Tamedyazt ɣer-sen d aleqqem n wayen i d-ǧǧan wid-nni yuran ɣef tewririn “ Yiḍes n uḥeqqi», s wayen yettidir d wayen yettissin, d wayen yettwali umessedrar ass-a. D agni n temlilit akken kan yecbeḥ cbaḥa n ufexxar-nni deg-i debɛen izamulen n tlawin n at smaɛil am tecraḍ yersen di ṣṣura-nnsent. Imi ara d-ɛeddint s llebsa-nnsent icuban timleḥfin am wakken sselfent i tarwa s rrezg i twenza, ad ilin ixulaf yurja uzekka. At smaɛil, xas yeǧǧa-tt uḍar d iseggasen-aya tura, tuɣalin ɣer-s am win ifuden yeswa. Iɛeggalen n tdukla n wedrar n fad neggin d idles, d tamusni, d taqbaylit, neggin d sser i zzuzuren di kra din d asefru yettazzalen deg yilsawen. Llin tiwwura i Imaziɣen n tmurt d wid n tmura n medden. Ssaɣayen taftilt n usirem i yidles-nneɣ imi seg ulac fkan-d aṭas, xas ixus ttawil, xas xuṣṣen imukan d tzeɣwin deg-i ara qedcen, maɛna s wayen i ttawin deg wul, s umennuɣ-nnsen, d uleqrar ad ssiwḍen ɣer wayen urjan d wayen ssarmen am nutni am wid yecfan ɣef tewririn xas ulamma aṭas i tent-yettun!
Zira