Ulac ass ara iεeddin, tineggura-a, mebla ma yella-d ujdid sγur sindicat. Yal aḥric n lxedma iger-d iman-is. Acu kan wid i ten-yesṭuqqten d sindicat-agi n uḥric n leqraya. Mebεed Cnapest i yessawlen γer uneḥbus n leqraya, ddurt-agi iεeddan, d UNPEF i ixedmen (corps communs) yiwen ibeddi sdat n tenmehla n ttrebga n lwilaya n Tizi Wezzu. Nemlal Mass Sarni Hassan amaru amatu nTizi Wezzu n sindica-agi, yerra-d γef kra n yisteqsiyen.
Aγmis n Yimaziγen : d acu akka i aken-id-yessekkren tikelt-a, diγ ?
Hassan Sarni : tikelt-a, la nettnaγ γef le statut particulier. Nessaram ad tefru temsalt deg ussan-agi i d-iteddun. Ayen neḍleb akk ad d-yettwaqbel ma ulac ur nettsusum ara. I wakken ad d-tawiḍ izerfan-ik ilaq ṣṣut-ik ad yebbazeq. Γef wakken nwala, fkan-d yimḍebbren udem yelhan, ma d tidet-nsen dγa.
Niqal tedduklem deg umennuγ afus deg ufus d CNAPEST, d acu yeḍran gar-awen ?
D tidet, nelḥa-d amecwar akken yid-sen, meεna banent-aγ-d tmuγliwin mgaradent.Tettdummu tdukli anda yettili umsefhem. Aṭas i asen-newwi.Uγalen εeddan tilas. Uγalen ur aγ-d-ttcawaren ara, yerna ad d-ḍelben deg-neγ ad neddu yid-sen. Ihi, si lğiha-nsen i d-yekka ucerrig.
Γef ucerrig-agi, dγa, yal sindica yebḍa γef sin, ala kunwi UNPEF, acu n sser-agi ?
Ur yelli sser yellan. Kra n sindica yebḍan ad t-tafeḍ axater yemmal γer yiwet n tama n tsertit. Nekni nwexxer i lecγal-a. Imeγnasen n tsertit yellan gar-ane&gamma,; xeddmen-tt berra n sindica.
Ula d kunwi yeffeγ niqal wawal dakken temmalem γer tama-agi tineslemt.
Tagi d ddiεaya i d-yefγen sγur UGTA iseggasen-nni imezwura imi walan yebda yettimγur sindica-agi-nneγ. Ugaden ad d-ggrin weḥd-sen. Meεna, ixeddamen ttwalin deg unnar, fehmen timsal yiwet yiwet. S lxedma-s akked tirrugza i swayes yewweḍ UNPEF γer umekkan anda yella ass am wass-a. Ihi, yesεa lḥeqq UGTA imi yugad, yeẓra yekfa zzman-is.
Yekfa zzman-is ula di les œuvres sociales, εlaḥsab n tefranin-nni iεeddan.
Les œuvres sociales n yixeddamen n leqraya, ad uγalen i yixeddamen. Akken qqaren ‘’ad d-yuγal sser tamurt’’. Ad ten-selḥun yixeddamen n twacult n leqraya akken iwulem. Zik, d wid yellan berra i yesfaydin yis-sen.
Awal-ik aneggaru
Mazal yiwen usenfar ameqqran la yettraju deg-neγ. Wagi d aεiwed n tmuγli i uγerbaz azzayri, ladγa deg wahil-is d wamek teddun lecγal. Tanemmirt i Uγmis n Yimaziγen.
Yesteqsa-t Hocine.M