Dda Belεid d isem-is n tẓuri, isem-is aḥeqqani Muḥend Uyidir Buεraba, yurar di ddeqs n yisura s tutlayt n teqbaylit deg tilizri n Lezzayer amaṭṭaf wis 04 n tmaziγt, ger-asen » Axxam n Dda Meẓyan ».
Dda Muḥand Uyidir Buεraba Ilul ass n 22 yennayer 1947, di taddert n Sidi Yaḥya, taγiwant n Cemini, lwilaya n Bgayet. D amecṭuḥ yekcem γer temεemmart n taddert-is anda id-yelmed leqran, syen yekcem γer uγarbaz n Fransa almi d tagar n ulmud-is. Deg seggas n 1958, lεeskkar n tmurt n Fransa yexdem yiwet n zeḍma qessiḥen γef taddert-is, anda itt-hudden s lekmal-is, dayen i idegren tawacult-is fγen zedγen deg yiwet n taddert, uγalen rruḥen γer Lezzayer tamanaγt.
Mbaεd timmunent, yexdem deg aṭṭas n yimukan, syen yekcem s wudem unṣib γer radyu taγelnawt n teqbaylit, amaṭṭaf wis 02 deg seggas n 1965. Yurar di deqs n tedwilin ger-asent » Arrac n Lğennet » n Σebdelḥamid Bali, dγa Dda Muḥend Uyidir yufrar-d ger imeqranen, imi ibeggen-d lxedma-s s tayri, s laḥdaqa d tmusi-s, yefka azal i wayen ixeddem. Yurar daγen di deqs n tecqqufin n umezgun i yetwasnen aṭas di tallit-nni, ger-asent « Amek id leslak-is » n Zubir Talbi, « Don quichotte » n Muḥamed Unis. Deg seggas n 1966, ibban-d i tikkelt tamenzut di tilizri n Lezzayer di tecqqufin unecraḥ akked Σli Σebdun, Muḥamed d Saεid Ḥilmi. Aseggas 2007, yekcem annar n ssinima s tahri akked yemddukal-is Mhenni, Acruf Yidir, Salaḥ Waεmer, Sid Σli nAt-Qasi d waṭas niḍen. Yurar-d di deqs n yisura s tutlayt n teqbaylit deg tilizri n tmaziγt, amaṭṭaf wis 04, ger-asen « Axxam n Dda Meẓyan » s yisem n Dda Belεid, « Yak Nniγ-ak », » Aḥlil-Aḥli », « Bu-Tqurdac ». Akken id-yurar deg isura niḍen id-yettεeddayen deg 04 n yimaṭṭafen n tilizri n Lezzayer ; » Σemti tafssus, les aventures de khalti Mounira, Dar Elbahğa akk Ḥabit Netzeweğ ».
Anaẓur, Muḥen Uyidir Buεraba, yemmut tasebḥit n wass n lexmis 03 dujambar 2015 di Lezzayer tamanaγt di laεmer-is 68 n yiseggasen, mbaεd aṭan it-yeṭfen deg acḥal n yiseggasen. Tamṭelt-is tella-d di tmeqbert n Lεalya di lezzayer tamanaγt, mbaεd taẓalit n lğumuεa, s leḥdur n deqs n yemḍebren n tnaγlaft n yedles tawacult n tẓuri d yemddukal-is.
Islam Bessaci