Seg wass n 19 alamma d 23 seg waggur n maggu ideg i nella, tamdint n Tubiret teldi tiwwura-s i rreḥba tis 8 n udlis d uktelɣu Amaziɣ i d-yessewjed Usqamu Unnig n Timmuzɣa. Rreḥba-a tis 6 i d-yettwaheggan di temnaḍt-a d tin i d-yellan s ddaw leɛnaya n tneɣlaft n yidles akked lwali n Tubiret.
Tikkelt-a, imḍebbren n HCA, fernen ass n 19 maggu iwakken ad yili d tajmilt i unelmad Azzayri am wakken d tawwurt i usmekti wis 50 n timmunent n Lezzayer.
Aṭas n tezrigin i d-yerzan ɣer Tubiret iwakken ad d-fkent afud i usnerni n tmaziɣt, imi Tamnaḍt-a d talemmast gar waṭas n temdinin n tmurt. D ayen ara tt-yeǧǧen ad tili d rreḥba i temlilit n yimusnawen d wid akk i iqedcen ɣef yidles d tusna.
I tikkelt tamenzut, rreḥba n udlis d uktelɣu Amaziɣ yewwi-d ɣer yidis-is anaray yettḥaraben ɣef yizerfan n yimyura, yiwet n tesqamut s wazal-is ara yesnernin di ccan n tfaska-agi.
Mačči kan deg temdint n Tubiret d uxxam n yidles Ali Zamoum ideg ara yili leqdic, maca yella-d usnerni deg yiḥricen-nniḍen. deg wass amenzu, imezdaɣ n Tubiret tettunefk-asen tegnit iwakken ad walin asaru yewwin arraz n tzemmurt n wureɣ. D Yazid Smail, win yessulin asaru-a iwumi isemma “baba Muḥ” i d-yellan di tzeqqa n uxxam n yidles Ali Zamoum.
Am wakken daɣ i d-tella tɣuri n kra n yiḍrisen n Mulud Ferɛun, Mulud Mɛemri d Muḥya. D tagnit i yettunefken i waṭas n wid i iḥeḍren iwakken ad slen i ugerruj i d-ǧǧan wigi, ladɣa ixulaf i d-yettnekkaren, wid ur d-nemlal d wayen nnan d wayen uran tlata-a yergazen.
am wakken i d-yettwaddem aseggas-a yiwen n rray anda akk tizrigin i d-yerzan ɣer Tubiret ur ttuɣalent ara mebla ma nzan akk yidlisen i d-wwint. Ayen ara yawin yimeɣriyen d aḥric, ayen ara d-yeggrin ad t-tawi tmehla n yidles n temdint-a.
Tasebḥit n wass amenzu n rreḥba-a, d lwali n Tubiret akked umaray amatu n Usqamu Unnig n Timmuzɣa i d-yellan di lmendad n tulya s wudem unṣib n rreḥba-a.
Ata-n wayen i d-nnan:
Mass Ali Bouguerra:
Tubiret am lɛada-s, teldi tiwwura-s i rreḥba-agi ara d-yefken, mebla ccekk, afud ameqran i yidles amaziɣ. Ɣas akken ur tessefk ara tegnit iwakken ad nesnerni ugar tafaska-a, maca, deg useggas i d-iteddun ad d-nesnubget atmaten-nneɣ imaziɣen n Tunes, Lmerruk d Libya iwakken ad as-nefk i rreḥba-agi udem agraɣlan.
Tubiret, d tin ara yesnernin di ccan n yidles amaziɣ.
Mass Youcef Merahi:
S lferḥ d ameqran i d-nuɣal ɣer Tubiret ilmend n rreḥba tis 8 n udlis d uktelɣu amaziɣ. D tikkelt tis 6 ara tettwaxdem da di Tubiret, imi lebɣi-nneɣ mačči kan ad yili udlis, maca tamuɣli tenfel akkin i tizi. Iswi iɣer nebɣa ad naweḍ dakken Tubiret ad tuɣal d tamaneɣt n udlis, imi tamnaḍt i yesdukklen acḥal n tamiwin n tmurt d temdinin timeqranin.
S. M