Tlata n yiseggasen, amzun d yiwen n wass, segmi yewweḍ leɛfu n Rebbi yiwen seg tarwa n leḥlal i d-tefka tɣiwant n Saharidj. Moussa Akmouche, imi d netta i yuklalen ad as-nerr tajmilt, yedder d anazbay, ur yeqbil ad iɛebbi azaglu. Yezga ixeddem di tili, imi akken i d-yenna Einstein:” argaz d win ixeddmen ad yesɛu leqder, mačči iwakken ad yekseb cciɛa.”
Am netta am tizyiwin-is, yekcem annar n umennuɣ ladɣa seg useggas n 1988 d afella. Yezga yettnaɣ s tikta iwakken ad d-yessukkes seg tatut idles-is, tutlayt-is d wayen yettuqemḍen.
Di tefsut taberkant, Moussa yeffeɣ-d s annar iwakken ad yessejhed iɣil n umussu. D yiwen seg yiɛeggalen n leɛrac i ixedmen s ṣṣfa d nniya. D ayen i yeǧǧan imezdaɣ n tɣiwant n Saharidj ad gen deg-s laman iwakken ad yemmeslay s yisem-nsen anda ma yella-d ugraw. Ad iciwer uqbel rwaḥ, ad d-yerr lexbar yal mi ara d-yuɣal.
S kra n win akk i t-yesnen, yettban s taffa n yiɣmisen deg ufus, ulac ayen i idergen fell-as, kra n wayen yeḍran yeẓra-t. Di tallit-a n lḥers, yebded ɣer tama n yimezdaɣ n tɣiwant-is, yerra-d nnuba i wawal. D tagnit i ifures iwakken ad yesseftutes tiktiwin-is ama deg ubrid, di leqhawi neɣ anda nniḍen. Yezga yettwellih ilmeẓyen, yessakay-iten ɣef uḥareb ɣef tnaṣlit.
D aneɣnas i ur d-necliɛ ara ma bedren-t-id yiɣmisen, neɣ ahat iban-d di tiliẓri. Yenjer abrid, yettmuqul kan amek ara yaweḍ lebɣi i ssaramen yiqbayliyen imerra, d yizzayriyen sumata.
Ass-a, ɣas akken iɣab, taddart-is, imeddukkal-is d wid akk yumnen s umennuɣ ɣef talwit d tugdut ad as-rren tajmilt, imi akken kan i yedder i yemmut. Ur yeḥwis, ur yexdiɛ ur yelli seg wid yeṭṭmaɛen.
Tṭes di talwit a Moussa, skud mazal tarwa n leḥlal amennuɣ i t-ferneḍ mazal ad ikemmel, abrid i t-nejreḍ uɣen-t yimagdayen i k-yecban.
S. M