Aqlaγ di tγaltin n Ğerğer di taddart n At Weεban, taγiwant n Uqbil tama n Micli. Am wakken tella d lεada γer yimezdaγ-is, yal taggara n maggu ,ttheggin-d timecreṭ anda zellun azal n setta n yizegaren mebla lmal amectuḥ gar wakraren d iqelwacen. Win yebγan tajaddit yali ar At Weεban. Ass n tmecreṭ ixulef ussan-nniḍen: tafejrit ibeddun yimezdaγ-is leqdic imi nnumen di tugnatin n lferḥ , At taddart d tirnii d-ttbeddan ; ulac ass-nni win yeγran neγ win ur neγri. Deg umekkan n tmezla, akk xeddmen, yal wa s uxeddim-is am warrac am yilmezyen. Ma d imγaren, seg lebεid ara d-tesleḍ i leṣwat-nsen imi d nutni i yellan ilmend ubuddu n dεawi i wid ittseddiqen. Ula d tiwaculin tiweεbanin ur ttunt ara kra n wansayen-nsent. Dγa ass n tmecreṭ d tagnit i win yesεan agrud werğin yeffeγ ad t-yessufeγ s tuksa n uγummu akken ad t-walin akk medden s useddeq n tedrimt neγ n tgella ara ččen wid iqedcen deg tmecreṭ d wid i yerzan seg yal amekkan, rnu ar tmecreṭ, aserreḥ n waman seg udrar i d-yettilin tasebḥit n wass akken ad swen yimezdaγ lebḥayer-nsen. Ass iteddu alma yelḥeq-d ufraq n uksum i yellan yebḍa εlaḥsab n wuṭṭun n yimezdaγ: mkul yiwen ad yawi amur-is mebla ma ttun ula d inebgawen neγ iγriben; ass-a ulac amgired gar uẓawali d umerkanti imi mkul yiwen ad yečč amur-is n uksum. Am wakken, daγen, i d-yettili leqdic n snat n tiddukliwin (tadelsant d tin n twenadt) d timsikniyin (tagella,llebsa,imeγan,leεwayed n zwağ…). Ayen yernan sser i wanect-a, di taddart-agi, d arrac imectaḥ i yefkan azal i wayen sεan di tigemmi d timent taqbaylit anda i asen-llan yilmeẓyen i lmendad. Γer tmeddit n wass, yella-d uberrreḥ n ccix akken ad ẓren akk yimezdaγ acḥal n tedrimt i d-jemεen. Tadrimt-a ad tettuserref akk i lfayda n taddart. Aya, dayen i nwala, dγa, imi d taddart zeddigen, tettuseggem. Imezdaγ-is ttqadaren lqanun n tmetti-nsen. Ihi win yebγan tanaṣlit d teqbaylit ad yerzu kan γer Wat Weεban.
D.said lhadj