Tekemmict n lḥebb lemluk yersen di tlemmast n ccac amellal, axxam yesrebrub, tisura…brarḥent tewwura. Usu yessa di lqaɛa, lmusiqa tezzuzun timeẓẓuɣin yebɣan ass-a ad slent ala i wayen ilhan, i wayen yettačaren tiṭ xas ur t-walant ara: Da d Asefru, da d lmusiqa, da d axellal, da d tiqit. D tiɛeqqucin n lmerjan yesnin d azrar yettcebbiḥen tamgerṭ. D tiwiztin deg ufus azelmaḍ, d afus ineǧǧɛen akal s tqabact akken ad d-ifek tudert, mi tt-id-yefka, d afus-nni daɣen ara tt-iɣeḍmen, d afus-nni i tt-imegren i tt-yesswayen, i tt-yessusuyen, itekkes-as ayen i tt-iqerrɛen ur tgemm ara akken ilaq, ur as-yettɛedday ara ubeḥri. D afus-nni i yeẓẓan ijeǧǧigen, lyasmin gar-asen, unuɣ-nnsen yecbeḥ, d amsari, yis-s ɛeqqlen-kem, akka i d-am-nnan! Ticraḍ mebla idammen, ɣer-s d ayen yellan deg ul, dayen i d-yesneṭqen tisiswa, dayen yessendekwalen allaɣen, ssuturen aman, akal, times, tilelli… timecki akken ires leɛqel, imru yettazzal, yessazzal tira deg yiger amellal : inzizen, tiḍudac, tagiṭart xas terreẓ truḥ d iceqfan. Tizlit n rruḥ, acewwiq n tudert, tellez, tesmuhbul, tesmed ajajiḥ n tmes inebbec waḍu n tisselbi, axxam ajdid imi t-kecmen, lebɣi d lbenna n tira, ixelleq-d rruḥ anda akken ur yella, am wayen yesɛan leɣri, ad t-ɛerken iseggasen, ad yennejbad, ad yefti, ad yif kra yellan iḍelli.
Zira