Rruḥ n leqbayel ad telli tiwwura deg wagur-agi n yulyu i waṭas n tfaskiwin n yidles d tmerrit. Si tfaska n Muḥend Saɛid Amlikec, amedyaz agrawliw ara d-yilin di tezmalt deg wussan n umenzu (1) alma d rebɛa di yulyu, d timlilit n imedyazen, n imyura d imusnawen n umezruy, alma d tamdint n Bgayet degi ara d-tili, i tikelt tis ɛecra tura, tfaska n ccna s tmaziɣt. Aseggas-a d tamxaleft imi aṭas n ujdid ara d-yilin. Yuɣ lḥal teɣli-d d umuli wis xemsin n timmunt n Lezzayer, maɛna si tama nniḍen d amuli wis ɛecra n tfaska-yagi. D tasqamut n tmeɣriwin n temdint n Bgayet d iɛeggalen n tɣiwant ara tt-id-iheggin i useggas-a. D timzizzelt n ccna i wid merra yebɣan ad ikin s yal ṣṣenf n ccna, ama iman-nnsen ama d tirebbuyaɛ, afran amezwaru ad d-yili di tagara n yunyu degi nella. Am wakken daɣen ara d-tili d tajmilt i ucennay meqqren Dda Crif Xeddam yecnan tamurt d rruḥ n leqbayel, d tajmilt daɣen i waṭas n icennayen nniḍen yecban Bujemɛa Agraw, Wisam, Arezqi Buzid, artg.
Tafaska ad tt-ḥedren i useggas-a aṭas n icennayen mucaɛen ama si tmurt ama si berra n tmurt: Ccix Sidi Bemol, Akli.D, Ǧamal Ṣabri si terbaɛt “Les berberes», Ḥasiba Amruc, Racid Kusayla d waṭas n icennayen nniḍen. D ttiɛad n yidels ara yernun di sser i unebdu-yagi, di Bgayet.
Amayas At.L