Azal n ɛecrin n yimedyazen i yettekkin di tedwilt tis ukkus( 4) n « temzizelt n tmedyazt Matoub Lounes » ass n ssebt 23 Yunyu di tzeqqa n uɣerbaz amenzu Matoub Tayeb deg Tewrirt Musa ilmend n umuli wis 14 n tmenɣiwt n unaẓur ameqran n tmurt n Leqbayel Matoub Lounes. Timzizelt-agi i d- tessewjed tamelsasiwt ( fondation) yewwin isem n unaẓur s timad-is, am tedwilin yezrin tesdukel ayen ifazen d wayen yellan kan d alemmas am akken id aɣ t-id- yenna Amsedrar ( d amedyaz yernu iqeddec deg uḥric n sinima) : « iswir n tedwlit- agi d alemmas ama deg wayen yeɛnan azal n yimettikiyen neɣ tamedyazt iwumi nesla. Ahat, aya yekka-d seg lqella n uberreḥ ɣer timzizelt-agi, meḥsub ur d- mmeslayen ara fell-as aṭas yiɣmisen, daymi tuget n yimedyazen ur slin ara s tilin- ines ». Maca, xas akken yella lxiṣas, s demma n tesqamut n waktazal (ɣef llan iɛeggalen-agi : Mass Ait Slimane Nordine, Mass Ahmed Lahlou,Amsedrar , Hamid) tadwlit-a tewwi-d yid-s kra yelhan u tesneɛt-d iberdan imaynuten tuɣ tmedyazt taqbaylit . Aya, yettban deg yisefra i d-wwin kra n yimedyazen am Iguenan Dalila, Meziani Fares,Sediri Fahima, Khali Tinhinan…
Di taggara n temzizelt, tasqamut n uktazal tefra-tt ad tmudd ukkuz( 4) n warazen : «arraz n usebɣes» i yuɣalen i yilemẓi (13 n yiseggasen di lɛmer-is) Atmani Abranis, «arraz n wanbaz( résitance)» yuɣal i umedyaz Aouchich Mohamed, «arraz n waktay (mémoire)» i Azemur Yasin, ma d « arraz Matoub Lounes (arraz amezwaru)» yuɣal i umedyaz yettwasnen aṭas (imi mačči d yiwen warraz i yewwi di tfaskiwin n temdyazt yettilin di tmurt n leqbayel di Bgayet neɣ di Tizi) Ahmed Xaṭabi.
Tasqamut n waktazal teffeɣ-d diɣ s kra n yiwellihen akken «timzizelt n tmedyazt Matoub Lounes» ad taweḍ iswi ɣef wacu i d- tennulfa. Akken id aɣ- d- yenna Umesdar : «ilaq timzizelt- agi ad temgared ɣef tiyaḍ. Ilaq ad tesɛu ṛruḥ-is. Ilaq imedyazen ara d-yasen ɣer timzizelt-agi ad as- fken udem-is. Deg temzizelt-agi, nessaram azeɣzef n tidmi n Matoub yellan d talsawit, d usnerni n umenuɣ- ines yellan ɣef tlelli d yizerfan, tugdut akked teqbaylit. Nebɣa deg rreḥba-agi, u ddaw leɛnaya bab n wawal, Matoub Lounes, amyag n teqbaylit ad yeddem nmara, tabɣest akked ucqirrew akken kra yellan d aɛewwiq zdat n tenfalit n teskla –nneɣ d usǧuǧǧeg n timadit-nneɣ ad yeffeg, ad yettwakkes». Ɣef waya, gar yiwellihen yellan (s id- tegla tesqamut n uktazal) aberreḥ s temzizelt-agi di lawan akken ad tesmed amur ilaqen n yimedyazen (si yal tama n tmurt) ara s- igen ccan i tidmi n Matoub . Si tama nniḍen tewwi-d akken ad tili temzizelt di tzeqqa iwulmen annect-a( mačči deg uɣerbaz), am wakken diɣ ilaq afran n yimedyazen ara yettikkin ad ilin d wid yesnernan di telqay n wawal aqbayli, d wid id- yewwin kra seg tala deg id- yugem tamedyazt-is Matoub Lounes. Am wakken id aɣ- yenna Mass Ahmed Lahlou : «la nteddu ɣer yiswi-agi s ttawil, mebla leɣṣeb, imi lebni n wayen yelhan yeḥwaj akud. Taḥjurt ɣef tayeḍ ad nesbedd aɣrab n tmedyazt tamḥaddit akken ilaq, ad as-nefk azal-is, ad nesnerni di ccan-is, ad nexdem yakk ayen ilaqen akken ttejra n leḥlu ad as- id- yuɣal umdiɣ-is.
Assen n 25 Yunyu ttwaferqen warrazen ɣef yimedyazen id- yufraren, Mass Hamid yellan ɣef uqerru n tesqamut n uktazal yeɣra-d iwellihen-agi i iqublen wid teɛna temsalt akken ilaq. Tamugent tettunefk i qabel akken ad mlilen yimedyazen d tmedyazin deg tedwilt tis semmus (5), ad sburren tacḍaḍt n win iɣeḍlen aɣulad n ukukru, igan tilelli i wawal n teqbaylit : Matoub Lounes.
Ait Slimane Hamid