Tasebḥit n was n lexmis yezrin, aṭas n yiɛeggalen n laman n tɣiwanin I ibedden zdat uxxam n twilayt iwakken ad d-beggnen lɣiḍ-nsen zdat tmeḥqranit I yeḍran yid-sen. Ulamma azɣal n was-nni yuli s kra n tseddarin, imesbaniyen-a, s tlilit gar-asen n umwekkel-nsen, ugin ad brun I ṭṭbel deg waman, imi ɣef leḥsazb n umeslay-nsen, liḥala ideg ttidiren mačči d tin I d-yessefken I lxir. Yiwen gar wid yellan di tmesbanit-a, reffu yettban ɣef wudem-is, yeṭṭef leɛlam deg ufus, yenna:” ayen akka I nxeddem azal n waggur-aya d abeggen belli tewweḍ tfidi ɣer yiɣes. Nruḥ d iseflan, iwakken ass-a ad d-naf iman-nneɣ d rrif. D ayen ur nqebbel ara !”
Si tama-s win yettmeslayen s yisem n yiɛeggalen-a, Lahlou Aliouat, yenna-d :” Imḍebbren bɣan ad rẓen amussu-nneɣ s wulɣuten n lekdeb. D ayen ur zmiren ad ssiwḍen, imi akken tebɣu tluɣ tegnit, nekni ad neqqim seg wid ibedden alamma nessaweḍ ɣer lebɣinneɣ.” Yerna deg wawal-is:”Aqli seg wid ixelsen s leɣla ayen akka iɣef I d-nekker, imi imḍebbren ssawḍen ad iyi-kksen seg umkan-iw, ḥebsen-iyi seg lxedma. Maca, ur yelli d ayen ara iyi-yerẓen ifadden. Tajmilt ad tt-rreɣ I watmaten-nneɣ I mazal ar ass-a di Blida.”
Ad d-nesmekti dakken aneqlaf Ould Kablia yessufeɣ-d yiwen n wulɣu ussan yezrin anda I d-ibeggen tajernant n yiɛeggalen-a n laman n tɣiwanin d wayen ara yaɣen wid yenṭerren gar-asen. D acu kan, mi ara nwali timesbaniyin ttkemmilent iban, melba ccekk, mačči kan d aya I yellan deg tɣerɣert n usuter.
S. M