Ddurt-agi yezrin, ass n 25 ctember 2013, tuγal tejmilt s wazal-is i unaẓur, amedyaz Muḥamed Belḥanafi i tewwi tmettant ass n 04 furar 2012. Leqdic-a theyya-t-id tmahla n yidles n lwilaya n Tizi-Wezzu deg wexxam n yidles n Lmulud At Mεemmar. Γas akken llan wid yerza waṭan, ussan-d deqs n yinaẓuren d icennayen iqburen n temnaḍt leqbayel akked yemdanen niḍen γer tejmilt-agi. Akken i d-ussan yemdukkal-is n rradyu tis snat, anda i yexdem acḥal d aseggas. Kkes-d anwa ur yezzuzen s tmedyazt-is, s imeslayen ẓẓiden. Leqdic d win yebdan tasebḥit n wass n 25 ctember, s yiwet n temzikent γef tudert d umecwar n tẓuri n unaẓur, ayagi yella-d s wawalen n yicennayen iqburen n teqbaylit gar-asen Rabaḥ ufarḥat, Taleb Tahar, Belxir Muḥend Akli, akken id-rzan tamedit n wass yitran n cna n teqbaylit i yugmen di tmedyazt n Belḥanafi, wigi d Taleb Rabaḥ, Lewnis At Mengellet akk d Atmani. Dγa ddeqs n yinaẓuren d yemdukkal-is i d -yeffkan tinigit γef ayen yezreε unaẓur-agi yemγi. Akken iruḥen γer uẓekka-s di tmeqbert n taddert-is At Sidi Atman, sersen tameqint n yijeğğigen u s tareḥmen γef tarwiḥt-is Muḥamed Belḥanafi, ilul deg seggas n 1927 di taddert n At Sidi Atman tamnaḍt n At Wasif, d yiwen n wemdan i d-yefkan aṭas i tẓuri, d yiwen yebnan taqbaylit, d yiwen n lεinṣar idegi yugment ddegs n tsutiwin, d yiwen i d-yerran azal i teqbaylit, si tama niḍen yefka tabγest meqren i tmeṭṭut akken ad teqdec di tẓuri d yedles n teqbaylit γer tama n wargaz. Tajmilt tekfa ass n 26 ctember s yiwet n tmeγra meqren. Ayen i d-nenna γef unaẓur Belḥanafi drus maḍi, imi yuklal ayen yugaren aya.
Islam Bessaci