Yessufeɣ-d ussan-a umedyaz Ahcene Mariche amud-is wis tesɛa n yisefra umi isemma: «Tazlagt n tikta». Deg wamud-a, Ahcene Mariche isedda-d 31 n yisefra, ideg d-yewwi ɣef waṭas n yisental iceɣben imdanen n wass-a s umata, ad nebder kra seg yizwal n yisefra-ya : Aẓeṭṭa n tissist, Uɛwij d wuqqin, Imeṣleḥ, Aɛekkaz, Imerrka, Sniɣ-d ccfawat,..atg. Rnu ɣur-sen daɣen tajmilt i yerra i ugeldun n tmedyazt tamaziɣt Si Muḥend Umḥend deg yiwen n usefru ɣezzifen yesɛan 126 n yifyar. Deg usefru-ya i yes d-yefruri deg snat n tfaskiwin tigreɣlanin n tmedyazt i d-yellan di Tizi Wezzu deg useggas n 2010 akked Uẓeffun deg useggas n 2011 ; yeḥka-d deg-s tameddurt n Si Muḥend Umḥend d wayen akk i yesɛedda d lemḥan akken kan ad d-yini awal n tidet i icebbeḥ s tmeɣrut akked lemɛani. Deg wamud-a daɣen, Ahcene Mariche yessuqel-d yiwen n umedyaz afṛansis, wa d Jules Antoine i s yes mebla ccek yebɣa ad as-d-yernu i teqbaylit tiktiwin n wiyaḍ neɣ n talsa am nettat am tutlayin-nniḍen. Ahcene Mariche s wamud-a amaynut «Tazlegt n tikta», yebɣa-t ad yili d amnir ara iwelhen imdanen n wass-a ɣer lewqam d yisseɣ akked tayri , am akken daɣen i nezmer ad t-nɛud d lemri i d-yeskanen tidet d leɛyub n tmetti-nneɣ akked talsa umi mazal assirem akken ad seggmen. Ɣer yidis n wamud «Tazlegt n tikta» i d-yessufeɣ deg ussan-a umedyaz Ahcene Mariche, atan daɣen yessaẓreg-d yiwen n wamud n yisefra s tutlayt n tefṛansist s uzwel : «La toupie et l’échelle». Adlis-a d tasuqilt i yexdem Ameziane Lounes i wamud n yisefra i d-yessufeɣ yakan Ahcene Mariche s tmaziɣt deg useggas n 2009 umi yefka azwel: «Tibernint d ssellum».
Mokrane Chikhi