Ass n lǧemɛa yezrin, lewhi n tmeddit, yemmut yiwen n umdan yesɛan 29 n yiseggasen di lɛemr-is deg ubaraj n wsif n Lekḥel i d-yezgan di AIN bessem, tama n umalu n twilayt n Tubiret. Ilemẓi-a, izedɣen di temdint n Ain Bessem, d ababat n sin n dderya, tuɣ iwulef yettruḥu s amkan-a labeɛda deg wussan-a ideg yegget uzɣal iwakken ad yertiḥ dinna daɣ ad icucef. Maca, tikkelt-a, segmi iwalan yimawlan-is belli iɛeṭṭel-n, nudan s amkan-nni anda i t-ufan yeɣreq. Dɣa, ssawlen i yiɣallen n usellek i d-yusan s lɛejlan, d acu kan ssuksen-d lǧessa i yeffeɣ rruḥ.
Si tama-nsen, iǧadarmiyen n temdint-a ldint yiwen n unadi ɣef tedyant-a, i d-isersen leḥzen d ameqran, yesgujlen sin n dderya.
Ilaq kan ad d-nesmekti belli abaraj-agi, seg wasmi yettwaxdem, yessebleɛ ugar n ɛecra n yimdanen, aneggaru deg-sen d yiwen n uqcic yesɛan azal n 16 n yiseggasen di lɛemr-is i yessufɣen dinna tarwiḥt azal n sin n wagguren-aya.
S. M.