D yiwet n tunṭict s wazal-is ara d-yazen seg At Leqser azekka umedyaz Ahmed Menas, i kra n wid iḥemmlen tamedyazt. D yiwen n ummud n 20 n yiḍrisen isuman akka aṭas n tlufa anda yeɛred mmi-s n Boumnazel ad t-id-yawi s yiwen n ubrid ixulfen, acku s kra mi ara d-yebder aγbel ikeffut s usirem. D amdan yebγan ad yeckenṭeḍ di tudert, yugin berru n ṭṭbel deg waman. Ɣas ulamma seg temẓi-s i t-yewwi wadu n tmedyazt, maca yegguma ad i ɛeddi s abrid n tira, imi d amdan yettwalin ahat d yiwen n ccγel i d-yekkan nnig tezmert-is. D acu kan, asmi yekker sseɛd n udlis-a amenzu, yufa-d γer tama-s wid d tid ara s-d-yefken afus n tallelt rnu d wid mehsub yellan deg unnar. Ahmed Menas, yezzi tamuγli-s γer umedyaz n taddart-is yewwin yakan arrazen deg tmedyazt rnu d aselmad n tsekla tamaziγt deg tesdawit n Tizi Uzzu. Wiyaḍ, d iselmaden n tmaziγt i d-yeğğan adlis-a yura akken iwata. D ayen ahat i d-ibeggnen axeddim zeddigen yebnan γef ccwer. Ma nezzi-d akka tamuγli s ammud-a, ad naf asefru amenzu d win iruḥen srid γer Lwennas, imi d tajmilt di tizwar, d asmekti n teγri-s i yimaziγen di tigat. Deg wagi dγa, yeqqen imeslayen n Matoub γer wid n Djaout s wudem-nniden, mi d-yenna : « d lmut ara mmte&gamma,; ma hedreγ-d, ma nniγ-d tidet, γas limer ssusme&gamma,; achal ara kkeγ ? Labud ad d-tehder twerqet, ah….imi rwaḥ ad ruḥe&gamma,; akka ay tt-xtare&gamma,; tudert heret-tt ». Amedyaz-a, yeɛred yessenteq-d Lwennas seg uzekka γef tedyant n lmut-is, iruḥ mebɛid deg usugen almi i d-yenna : « ticerket i yi-d-undin, ula d win yellan deg udaynin, yezra anisi i d-tekka». Isefra n Ahmed Menas ruḥen am lexyud deg uzeṭṭa, seg tedyant n Lwennas ɣer lḥeqq, imi d tajmilt i yerra i yiwen seg yimeγnasen n taddart-is, wagi d Berkani Ahmed, yettwasnen deg unnar n umennuγ γef yizerfan n tlelli. Asefru-a yekfan akka s wawal « yeǧǧa-aγ-d tteswira » inuqel yis-s srid asefru-nniden iwumi isemma tteswira, meḥsub awal aneggaru yezga-d d azwel i usefru i d-iḍefren. Awal n umedyaz simmal iteddu, yettiqsiḥ, imi deg usefru n « ttrika » yerra srid lfuci-s γer wid yessawḍen tamurt γer liḥala ideg tettidir, tin akken iγef yesberber lxuf, timenγiwt d tazzla n yidammen. Tagmat, tuγ amkan-is deg yisefra n Ahmed Menas, imi yewwi-tt-id s yiwen n wudem mi d-yenna : « tewɛer tyita n lemri, ma yuγ lekdeb di tegmat ». Imi, yugad ma yella lekdeb yudeg tagmat, d zzerb kan ara d-yuγalen γef wallen, i wakken γer taggara ad ferqen wid yemḥemmalen. Dima akka deg yisefra-s, amedyaz iger tiγri i wid ara yessuzfen lḥif mi akken yetti zzman γef medden. D asefru i yekfa s kra n yinzan ara yilin di lmendad i umeγri anda i d-yenna : « win yebγan ad yekkes lhif, ad yekker mi ɛziz yides. Win yebγan ad yehrez nnif, s yidammen-is ad t-ixelles».
M. Smail