Aqlaɣ deg usmekti n ugraw n Ṣṣumam i yemmugen ass n 20 ɣuct 1956 deg taddart n Ifri lɛeṛc n Wawzellagen i d-yezgan di lwilaya n Bgayet. Ma newwi-d awal ɣef ugraw-a (neɣ aswir-a) i yesɛan tixuṭṭeṛt deg umezruy n tegrawla n uslelli aɣelnaw, ilaq ad nemmeslay ɣef umeskar-is neɣ bab n tikti n temlilit-a i as-d-yernan afud i tegrawla. Wa d Ɛebban Ṛemḍan ameɣnas, aggag yettwaɣeḍṛen ɣer taggara s ufus n watmaten-is. Aṭas n lmidad i yuzzlen ama ɣef umezruy n tegrawla neɣ ɣef ugraw n Ṣṣumam neɣ ula ɣef tmeddurt n Ɛebban Ṛemḍan, acu kan amezruy yal wa amek i t-iɛerrek yal wa amek i t-yettaru ɛlaḥsab n tedyulujit iss yettamen. Nekni nefren-d yiwen seg yidlisen yuran s tmaziɣt ɣef tmeddurt n Ɛebban Ṛemḍan, d adlis i yura mass Khalfa MAMERI s tefṛansist ɣef tmeddurt n Ɛebban Ṛemḍan i ssuqlen ɣer tmaziɣt massat: Abdenour HADJ-SAID d Youcef MERAHI, uran-t s uɣanib d afessas i isuɛden tigzi ama i umeqqṛan ama i umeẓyan. Adlis-a azwel-is :”Abane Ramdane, ar taggara d netta i d bab n timmunent” , yeffeɣ-d ɣer teẓṛigin n Usqamu Unnig n Timmuzɣa aseggas n 2003. Deg udlis-a i d-nekkes tuget n yisallen i d-nsedda deg umagrad-nneɣ.
