Ilul Ɛebban Ṛemḍan ass n 10 yunyu 1920 deg taddart n Iɛezzuzen i d-yezgan di Laṛebɛa nat Yiraten. Tawacult ideg d-yekker ɣur-s ttrika: tesɛa igran iwesɛen i d-yettaken zzit n uzemmur d tazert, Muḥend, baba-s, yella d amzenzu, yemma-s Faṭima, tḥemmel-it aṭas d netta i d mummu n wallen-is ger wayetma-s d yessetma-s, i yesnernan leḥmala-agi d leqfaza-s akked tḥerci i yeḥṛec di tɣuri. Ɛebban d aqcic yesɛan zzheṛ ger tuzyiwin-is imi yekcem ɣer uɣerbaz amezwaru yellan di taddart-is, di tallit-nni tuget n twaculin tizzayriyin d tigellilin ur zmirent ara ad qament s umeṣruf n tɣuri n tarwa-nsent. Deg uɣerbaz, Ɛebban yufrar-d s waṭas ger wiyaḍ, d anelmad iqefzen nezzeh, iselmaden-is akk ttɛeǧben yes, yezga yettawi-d igemmaḍ igerrzen di akk tangiwin n ulmud. Mbeɛd mi d-yewwi akayad aneggaru n uɣerbaz amezwaru , win umi qqaren :« aselkin n ulmud amezwaru »(Certificat d’Etudes Primaires) yekcem ɣer tesnawit DUVEYRIER n Blida i yuɣalen syin d afella d tasnawit IBN-ROCHD. Din ara yebdu amecwar amaynut di tudert-is, amecwar ɣezzifen, iweɛṛen ara t-yerren d azamul n lebda.
Yettkemmil deg usebtar 13…