Yaḥya Yanes, yuɣal-d tikkelt-a s udlis iwumi i isemma: d kemma tayri ! Mačči takemmict n tmucuha i d-yessukkes seg yimi n tatut. Yaḥia, imi akka s timmad-is d aneɣmas, yesselmed yakan tamaziɣt acḥal d aseggas. Ass-a, ɣas akken yeǧǧa amkan-is di lakul, maca yeṭṭef-d tama-nniḍen n tira d usufeɣ n yidlisen. Imi ass-a tamaziɣt teḥwaǧ ugar n wayen yuran, ahat abrid yefren Yaḥia d win ara yilin di lmendad i tutlayt. D kemm a tayri, d adlis ara yerren tajmilt i tayri s wayen akk i texdem: tefka-d lbenna i tudert, tezdi acḥal n yimdanen, teẓẓa leḥmala deg umaḍal. Maca, ur nezmir ad as-nefk annect-a i tayri mebla ma nebder-d acḥal i tesnuɣna, acḥal n yisekla i thuz s waḍu-s.
