Meqqran Agawa d tigejdit n cna n Ddin n teqbaylit, isem-is aheqqani, Waεli Muḥand Ameqqran, ilulu deg useggas 1929 deg taddart At Σṭelli deg temnaḍt n Larebεa n At Yiraten, anda yettwamḍel ass n lḥed 13 ctember 2009. Aṭas n yemdanen id-yusan γer temḍelt-is deg yal tamnaḍt n tmurt iwakken at-zuṛrn i tikelt taneggarut, ger-asen aṭas n icennayen, inaẓuren, imḍebren n temnaḍt n Larebεa n At Yiraten akk d imḍebren n yedles n ugarzu n Tizi-Wezzu. Meqqran Agawa yeğğa-d idles s wayes ara tbed tγarma taqbaylit. yesekles 11 n tesfifin deg umecwar-is. Cix Meqqran Agawa yessen aṭas n inaẓuren iqburen ger-asen Sliman Σazem,Cix Lḥesnawi, Zaruqi Σellawa, Taleb Rabaḥ d wiyaḍ nniḍen. Yebda cna ass-mi yesεa 15 iseggasen deg leεmer-is. Seg imiren yekcem deg lebḥaṛ n tẓuri lqayen mači d kra. Aseggas 1950 yekcem γer Radyu n bgayet anda id-yekkes tamusni lak d waṭas inaẓuren nniḍen lawan-nni, am Σebd Lwehab Abjawi, Cix Sadeq…atg, yelḥa-d akken amecwar almi d aseggas 1962 i yeḥbes axeddim deg Ṛadyu n Bgayet, labaεda imi medlent tewwura-ines i lebda. Agawa d isem s wayes i s-sawalen yemdukal-is id wi ixeddem deg Ṛadyu, isem-agi yekka-d deg lεerc Igawawen neγ At Yiraten, anda i ilul. Labaεda mi id-yefaγ Dda Meqqran deg Ṛadyu aseggas n 1962 yekcem γer tmerrit( le tourisme), kra iseggasen mbaεd yufad abrid n tuγalin γer Ṛadyu taγelnawt n teqbaylit aseggas n 1972, maca ur iεeṭṭel ara iḥebs-d, dγa deg imiren yefren abrid n tẓuri s cnawi-ines d umeddaḥ γef ddin. Ayen id-yeğğa d agerruj ur nettkafa, ger tezlatin yecna ( Larebεa tin iwumi zzin leṣwar, d tajmilt i temnaḍt-is,Lzzayer…atg), yecna daγen γef cbaḥa n tmurt-is, γef ṣellaḥ, γef laxert. Dda Meqqran yedda aṭas γef temεemrin. Idum deg temεemmart n Sidi Σmar Welḥağ id-yezgan deg temnaḍt n Wizgan, anda yettmeddiḥ ilmend n tmaγriwin n ddin am Tεacurt, Lmulud, Laεyudat,Remḍan, agur ideg yewweḍ laεfu Rebbi. Dγa ass n sed 12 ctember 2009, tensa tcemmaεt id-yefkan tafat i yedles n teqbaylit s umeddaḥ γef ddin neγ ttedkir, Ccix « Meqqran Agawa », d temkerḍit n tmedyazt n ddin n teqbaylit.
Islam Bessaci