Illa yiwen umerkanti d amuqran, isεa lxiṛ maca d aεessas kan fell-as, acku iderγel wul-is γef yimeγban. Ihi ibγa ad iγiz lbir di tmurt-is, iwwi-d ixeddamen mechuṛen di
tγuzi n lebyur.
Mi la ttemsewwaqen γef ssuma, faqen-as ixeddamen belli d argaz amellaẓu, seg wid iḥemmlen ad yečč tidi n wiyaḍ.
Asmi iwala mačči d widen ara s-ixedmen baṭel, inna-yasen:-Teẓram ssuma-yagi ara teṭṭalebem awen-tt-fkeγ maca ur awen ttawiγ imekli wala imensi, wala lqahwa, ula d aman ala, tfehmem neγ ala ?
Nnan-as ixeddamen:-Nekni neḍleb azref n tidi-nneγ di kečč tebγiḍ ad tawiḍ Llah ibarek, tugiḍ Llah isahel.
Amerkanti:-Nniγ-d aman ala.
Bdan ixeddamen qqazen rennun maca ugin a d-banen waman.
Nnan-as:-Muqqel ay amedakel ayen γef nemsefham nγiz-it atan ur d-banen waman.
Argaz iwala ixseṛ idrimen, ixemmem inna-yasen:-Kemmlet γizet.
Ttkemmilen qqazen armi d anda ur zmiren ara nnan-as:-Ay argaz llεali ulac ulac,
aql-aγ nγez, nεedda tilas n lebyur.
Iddem urgaz ixelles ayen ur iγellet, inṭeq:-D lewhayem! dagi ufan akk deg-s medden aman ala nekk!
Inṭeq yiwen uxeddam:-Yak d kečč id-izwaren awal, mi d-tenniḍ aman ala, amek tebγiḍ ad tafeḍ.
Yahia Yanes