D ayen ur nedrig ɣef umdan dakken mi ara d-yaweḍ ttiɛad n tefranin, ladɣa tid n twilayt d tɣiwanin, yeṭṭuqqut umḥezwer ɣer yimukan imezwura n lejridat. Acḥal d akabar i yuɣen tiyita n utixxer n yimeɣnasen-is ɣef lǧal n waya. Tikkelt-a, yekker wahruḥu deg uheggi i tefranin, imi ulac tama ur neddir ara lḥers d yimenɣi gar yimeɣnasen d wid yettazzalen s akersi.
Bgayet: Tuṭṭfa deg YImenzayen Inemlayen, neɣ s wudem nniḍen, Tirni n YIɣallen Inemlayen.
D wagi i d amuli i s ara yendeh Hamid Ferḥat, i yellan akka tura d aselway n tejmaɛt n twilayt n Bgayet. Netta, yewweḍ i tikkelt tis snat s amkan-a deg lejrida n ukabar N Dda L’hocine, meɛna ata-n yebɣa ad d-yuɣal d amunan, wissen ma d akabar-is i t-yugin neɣ ahat acu i as-d-yessukkes. Ma nmuqel licara n wayen akka iɣef i d-yebded, ad tt-id nɣer d akabar n tirni n yiɣallen inemalyen (FFS) s wudem-nniḍen. Di twilayt-a, yekker uhetwir ɣef yimeḍqan imenza di lejridat. Ɣef leḥsab n yisallen i nesɛa, 08 n lejridat i tejmaɛt n twilayt i yersen akka tikkelt-a, gar-asent yiwet n yimunan. Ama d FFS, RCD, FLN d RND, ur tent-tezgil ara tawla n tazla ɣer yimukan imenza, almi ula d amaray aɣelnaw n ukabar n Ahmed Ouyahia di temdint n Bgayet yebra i ṭṭbel deg waman kra n tsaɛtin uqbel ad yekfu ttiɛad n trusi n lejridat. D ayen ara d-ibegnen mebla ccek lɣiḍ n umdan-a zdat ayen yettwaxedmen. Ma d akabar n MPA, yessaweḍ ad isers 15 n lejridat mi akken tin n twilayt ur tettwaqbel ara s-ɣur yimḍebren yessedduyen timsal n tefranin. Nnan-d dakken ikaramen , wid yellan di lejrida ur kmilen ara ahat yella kra i ixuṣṣen deg-sen.
Ihi, Bgayet d tin ara yeswesɛen annar i 241 n lejridat n tɣiwanin. Mebla ccekk ad d-ilal wayen ara ibeddlen udem n tsertit i nettwali zik-nni di temdint-a, anda Akabar n Si L’hocine d ukabar n Mohcine Belabbès ttnaɣen aniwa ara yawin tiremt n yizem. Maca akka tura, skud awal ɣezzif, yezmer ad d-yennulfu kra.
Tubiret: Aselway n tejmaɛt n twilayt deg umkan wis…56:
Tubiret ur teslik ara seg yimenɣi n lḥara ufella d tin n wadda. Akabar amenzu FLN i yeswehmen mačči d kra imdanen mi d-iban yisem n uselway n tejmaɛt n twilayt deg umkan wis 56. D ayen i yesserfan imḍebber-a i yettwalin aya d tuksa n leqder ama ɣef yiman-is netta neɣ amkan yeṭṭef seg tefranin n 10 maggu yezrin. Yuzzel akka wawal belli yejbed iman-is, ur yeqbil ara rray yettwadmen di cɣel yecban wa. Mass Hadjar, imi d netta ideg ters tyita yettwafren deg umkan-is Ziane ara yesseddun lejrida n ukabar n Belkhadem di Tubiret.
Ma d ayen yerzan lejridat nniḍen, 17 n yikabaren n tsertit i yessawḍen ad d-kecmen s annar n nḍaḥ ɣer tejmaɛt n twilayt, 30 ɣer tɣiwanin. Tineggura-a, azal n 228 n lejridat i yersen akka ttrajunt rray d wawal aneggaru n yimḍebbren, gar-asent tlata n yimunan.
Ma d akabar n Ahmed Ouyahia, tirgit urɛad texsi, mazal imeɣnasen ssuturen deg umaray amatu n ukabar-nsen ad d-iḍegger tiṭ-is ɣer wayen akka yettwaxedmen. Rfan mačči d kra, d ayen i izemren ad iḍur akabar-a ma ur yettwakkes ara lɣiḍ i yimdanen-a. D Mass Lamouri i yettwafernen ad yesseddu lejrida n ukabar-a i tejmaɛt n twilayt, mi akken akabar n FFS yefren Said Derraj, yellan akka di tejmaɛt n twilayt, ɣer tama n Boutata i yettwafernen deg ukabar n RCD.
Ma d akabar n MPA, d imḍebber-is amenzu di Tubiret ara yesseddun lejrida, imi Ahmed Slimani d tikkelt tamenzut ara d-yebded di tefranin, ma nmuqel wiyaḍ, yezgan di lejridat. Hamas, ad d-yebded tikkelt-a i yiman-is mebla ma yeddukkel d yikabaren i t-yecban am wakken i yella lḥal di tefranin n 10 maggu iɛeddan. D Hamou Djakboub i yettfernen i tefranin n tejmaɛt n twilayt.
Tizi Wezzu: Yeɛreq ccedd i uyeddid:
D tawilayt anda ur yezmir yiwen ad d-yaf amek ara yili leḥsab uqbel taggara n tefranin. Yal tikkelt tessexrab leḥsab. Aya ad t-naf aniwa akabar ara yeṭṭfen taqacuct, ladɣa di tɣiwant n temdint n Tizi Wezzu.
Tikkelt-a, ɣer tejmaɛt n twilayt 11 n yikabaren i isersen lejridat-nsen, mi akken 34 n yimunan kecmen-d s annar n tefranin, ma ɣer tɣiwanin, 329 n lejridat i yettwaheggan i 67 n tɣiwanin i tesɛa twilayt-a.
Nezmer ad d-nini kan, Tizi Wezzu, s kra n tefranin yellan, aɣunzu n yisendyaq yufrar s waṭas wid i d-yettasen ɣur-s, degmi i yezga leḥsab yexreb almi yeɛreq ccedd i uyeddid !
Wissen kan d acu ara d-yennulfun tikkelt-a ?
S. M