Qaṛṛen widen issnen, ijeṛṛben di tudert: » Win iḥemmlen mmi-s iṛebbi-t. ’’
Degmi ass-a tugett n yimdanen ur stuqquten ara di tarrewt n dderya, γas ad tafeḍ izmer i umεic-nsen, maca ad ak-yini i umi. Isdeq d ttrebga tewεer di zzman-agi, yiwen γer sin izmer umdan ad ten-iḥkem. Yiwen wass tella yiwet n tmeṭṭut, tesεa mmi-s d awḥid, tettagad fell-as nezzeh, deg wakken argaz-is di lγerba i yittidir, tṛebba-t s lebγi neγ s ttnefcic, ayen id-iḍleb a d-yaweḍ ama iwjed ama ad ittwarḍel, d yir tannumi d yir azekka, yuγal armi id-isnulfa yir ṭbiεa, a s-yini a yemma fki-yi-d kra ma ulac a d-ḍeggreγ iman-iw si taεrict, ma illa tugi ad yali γer taεrict ad istaεmel atan a d-iḍegger iman-is, yemma-s tettagad i ixeddem ad immet, a d-tendem meṛṛa di tudert-is teqqar-as:-D ayen, d ayen a mmi, rsed si taεrict ayen tebγiḍ a k-txedmeγ. Truḥ tudert n uqcic di yir tannumi.
Ibbweḍ-d urgaz-is seg yinig, ifreḥ s tmeṭṭut-is d mmi-s.
Yiwet n tikkelt inṭeq γer mmi-s:-Ammi eyya-d ad teččeḍ imensi.
Mmi-s:-Ur tetteγ ara seksu, bγiγ tamellalt.
Yemma-s:-A mmi tamellalt ur tewjid ara, d iḍ ayagi, ečč ayen illan, ṣṣbeḥ a k-d-nawi acu i tebγiḍ.
Aqcic:-Welleh ar d a d-tefkeḍ tamellalt neγ ad aliγ γer taεrict.
Baba-s:-Acu ara txedmeḍ di taεrict.
Yemma-s:-A d-iḍegger iman-is.
Izεef urgaz mi i isla imeslayen-agi uzligen, inna-yas:-Ali γer taεrict tura, lemmer ur tettḍeggireḍ ara iman-ik d nekk ara k-id-iḍeggren. Aqcic iwala tidett tuqriḥt, yuγal yugi ad yali, iqqaṛ-as:-Dayen a baba ad ččeγ ayen illan.
Baba-s:-Welleh lemmer ur ẓriγ ara belli d yemma-k i k-iṛebban akka, ar d a k-ssaliγ γer lqeṛmud mačči kan γer taεrict syin ara k-id ḍeggreγ s ufus-iw, acku lehdur-agi i tlemdeḍ mačči n yirgazen, n yir laṣel, n at ttnefxa ur nesεi azal.
Seg wassen yuγal uqcic d mmi-s n wass-is, iẓra d acu d ddunit, ihi timmad n umdan tettuwrat ama seg idammen nneγ si tmetti deg yittidir, win iḥemmlen tarwa-s ifka-s tussna d ttrebga tumεint d llsas.
Yahia Yanes