Tanemhalt n leɣwabi n lewilaya n Tizi wezzu d tin i d- yessufɣen yiwen n usaḍuf n uḥbas n tukssa n lɣella n yiqecci deg tẓegwa. Aya, imi tineggura-a d tid yenṭarren mačči d kra s sebba n yideflawen n ccetwa n useggas yezrin d tmes n unebdu, anda yegla uzegzaw s uquṛan. Ad d-nesmekti belli times yuɣen deg lwilaya n Tizi Wezzu d tin urǧin d-telli tin i tt-yecban, imi tendeh deg wazal n 474 n yimukan am akken i d- tessegla s wurɣu n 10 503 ihigṭaren, gar-asen 4 822 ha d leɣwabi, d 1 000 n yisekla n lfakya gar-asent 900 n tzemrin. S wakka, lɣella n yiqecci d tin ineɣsen mačči d kra aseggas-a. Deg lawan ideg yella yetturaju ujemaɛ n 7 500 iqenṭaren, ɣer taggara, ala 1 250 iqenṭaren I d- yettwajemɛen. Ad nerr tamawt belli lexsara I d- yellan deg yiqecci tessaweḍ ɣer 800 imelyunen n yidinaren, 443 imelyunen n yidinaren deg teẓgi n Yiɛeẓẓugen, 160 imelyunen n yidinaren deg Uzeffun d 80 imelyunen n yidinaren deg Tigzirt. Ɣas akka tiɣri d tin I d-yellan, maca mazal imdanen d wid I t-id- yetteksen.
D.I.