Yiwen wass tenṭeq tmeṭṭut γer urgaz-is, tenna-as: -Ay argaz bγiγ ad ruḥeγ ar tmeγra atan ad gent tulawin urar.
Argaz:-Ruḥ maca γur-m a t-εeddiḍ lawan imensi, ma ulac jmaεliman ar tebruḍ.
Truḥ tmeṭṭut, tεeṭṭel iεedda lmeγreb, mi d-tuγal irra-tt inna-as:-Tebriḍ ifat gulleγ.
Argaz iqqim itḥeyyer ibra i tmeṭṭut γef wulac, akken a tt-id-yerr iggul s jamεliman, amek ara ixdem, iruḥ icaweṛ kra di tejmaεit, nnan-as: -Tegguleḍ dayen, tameṭṭut tebra, bγir ameyyez d unadi.
Argaz ur isbiṛ ara i mi indem deg wayen ixdem acku tameṭṭut-is iḥemmel-itt, yufa iḍlem di ṛṛay-is. Ara itezzem iman-is ittru.
Yufa-t-id yiwen uḥbib-is, iwhem!
-D acu akka ik-yuγen ay amdakel?
Argaz:-Ansuf yis-k ay aḥcayci (argaz-nni qqaṛṛen-as aḥcayci) Lḥemdu lleh i mi k-id-ifka Ṛebbi, atan wul-iw iččuṛ.
Aḥcayci:- D lxiṛ kan.
Argaz:- Hatt maṣar, hatt maṣar.
Iḥka-as tamsalt.
Aḥcayci: – I testeqsiḍ tajmaεt n yimusnawen?
Argaz: -Awah! S teqsa&gamma,; nnan dayen.
Yuγal aḥcayci ifhem lumuṛ, belli tajmaεt ttmuqqulen kan anda ara ččen ad ṛwun isfelan, i wakken ad afen anda ara rkeḍen.
Aḥcayci: -Teẓriḍ, ass lmuḍaε flan εreḍ-d tajmaεt-nni n yimusnawen, εreḍ-iyi-d nekk ad waliγ.
Argaz iruḥ iεreḍ-iten-id yiwen yiwen deg yiwen wass, asmi d-mlalen, ibda uḥcayci a sen-d-iḥekku, a sen-d-isemεan awal, a sen-d-ittawi tiqsiḍin, netta yuγ lḥal d aḥcayci, issen akk lesrar iffren, armi tεedda lεica nutni mazal zzhan, yuγal kkren-d ẓullen lεica, nnan-as: -Rnu-a γ-d cwiṭ ay aḥcayci lehdur-ik d lemεun.
Inna-asen: -A nečč imensi a nkemmel, ahat telluẓem?
Tajmaεt:-Ala ur nelluẓ ara, imensi ur ifut ara, melmi nebγa a t-nečč.
Aḥcayci:-Atan ziγ imensi ur isεi lawan imḥedded, atan ziγemma tameṭṭut id-yuγalen qbel lεica ur tεedda ara awal n urgaz-is, atan ziγ imensi ur ittfat ara, ahya-ken ay iγeddaren, tebγam xellu n uxxam i wakken ad εemmṛen yiεebbaḍ-nwen.
“Mačči menwala ad iftu”. Win ifettun izwar lxiṛ.
Yahia Yanes