Tagi d tamacahutt γef win i γurren iman-is, inwa ifhem ddunit, tameṭṭut inehhun yelli-s γer leṣlaḥ acku teẓra mebla ṣṣwab ulac tifrat, ma d tin irennun zzit i tmes deg yijufar-is kan ara teṭṭef.
Yiwet n tmeṭṭut si tid ur tt-nebni γef ṣṣeḥ, truḥ γer yelli-s, tufatt-in tezεef, mi itt-testeqsa γef sebba, tenna-as: -Ulac a yemma d cwiṭ n wawal kan id-illan gar-i d urgaz-iw.
Di lεuḍ a tt-twehhi γer ṣṣwab, ad as-tini a yelli tameṭṭut iḥercen d tin ittsaεafen argaz-is, d tin isebbṛen ittsaεafen, win ittqabalen igersan d izilan γef lağal-is, tenna-as:
-Welleh a yelli ma hennaγ alamma walaγ-kem terriḍ-t ddaw iḍaṛṛen-im.
Mi i s-thedder argaz issel-d seg umnaṛ n tebburt, tameṭṭut tγil deg uzniq i illa.
Nettat teqqaṛ-as: -A yelli argaz am sellum ali-t kan dderğa dderğa alamma tuliḍ-t imiren ad txedmeḍ deg-s ṛṛay-im.
Yuγal ikcem-d urgaz inna-as: -Lεeslama a taḍegalt.
Taḍegalt teffeγ ur as-terri ara.
Inna urgaz i tmeṭṭut-is: -Acu akka yuγen yemma-m εni tqerjeḍ-as daγen cwiṭ-nni n wawal illan?
Tameṭṭut: -Ahakan ayen tebγiḍ ar γur-s ad tawḍed.
Yiwen wass tameṭṭut tebγa ad terkeb aḍu-nni i s-temla yemma-s, iwwi-tt-id urgaz-is isleγẓam-as ufus-is.
Truḥ-d yemma-s a tettcetki i lğiran, iffeγ urgaz-nni γer tḍegalt-is: -Ala a taḍegalt mačči d nekk i isleγẓemen afus, yelli-m, tebγa ad tali γef sellum-nni i s-d-temliḍ yuγal tezgel yiwet n dderğa teγli-d.
Tameṭṭut tefhem tamsalt, tuγ-itt mkemmed tessusem.
Ya saεd n win imlan abrid n ṣṣwab.
Yahia Yanes