33 n yiseggasen, akka mazal abrid yessawen. Aqel-aɣ ɣef tewwura n umulli n tnekra yerẓan tugdi, tin akken yezdin tagmat iwakken ad yeɣli uzaglu. Tasdawit n Tizi Wezzu tger irebbi-s i yinelmaden, iselmaden d yimusnawen iwakken ad sqerdcen taluft n tugdut s lekmal-is, imi aṭas n yebɣan ad rran tamsalt d tin kan iceɣben iqbayliyen. S tidet, tamaziɣt d nettat i d ifeṭṭiwej n tnekra, meɛna wid yellan deffir cɣel-a umnen dakken tutlayt ur tezmir ad tidir ma ulac tugdut d yizerfan n umdan. D ayen i yeǧǧan adabu n lawan-nni yuzen deg yiḍ n 19 yebrir 1980 iserdasen iwakken ad rẓen lḥerma n tesdawit. yekker wahruḥu, iɛekzan kkaten, iqejjan shewhiwen, tewweḍ tfidi ɣer yiɣes. 24 i qecfen s anda akken ur ten-yeẓri ḥedd. Meɛna, akken i as-yenna Lwennas: Ttun sɛan atmaten, ad ten-id-yessufɣen ! Tasebḥit n wass, xas akken sbiṭer yeččur d imejraḥ, iberdan merra ttwaɛussen, maca nnif d lḥerma ur sɛin ssuma. Yal tama tessurug-d, lxuf yunag seg wulawen. Bgayet d Tubiret ddant-d deg umennuɣ, xas akken qessiḥet tegnit. Yebrir yeqqim-d i cfawa, yensex deg wallaɣen, yeldi allen i yimdanen. D tafsut s lekmal-is, deg-s i d-teǧǧuǧeg tugdut, acku d netta i yekksen ẓẓerb i tugdi. Yal aseggas d asfugel n tefsut n Yimaziɣen, yal aseggas d ameslay ɣef wayen yeḍran d wayen ilaqen ad d-yeḍru. Deg useggas n 1994, ɣas akken tasdawit n Tizi d tin n Bgayet ldin tiwwura-nsent i uselmed n tmaziɣt, meɛna skud ur yebdi ara si lsas, yuɣal d aɣebbar s allen. Yendeh uɣunzu n lakul, 8 wagguren i medlent tewwura. Tamaziɣt-nni teqqers-d seg yifassen n yicenga, tudef s aɣerbaz. Ass-a ɣur-s azal n 18 n yiseggasen. Qqaren-tt yinelmaden deg uswir amenzu, qqaren-tt deg uswir alemmas, tella daɣ di tesnawit am wakken i tella di tesdawit. Ayadra, ma nezmer ad nesteqneɛ s waya? Tiririt tban am uzal, mazaaaal ! Skud akka ur telli ara d tanga tunṣibt di lakul, ur telli leqniɛa. Skud akka mazal ttextirin deg-s yinelmaden aniwa ara tt-yeɣren, aniwa ur nebɣi ara, ur telli leqniɛa. Skud akka ur tebdi ara seg useggas amenzu n ulmud, ur tezmir ad tili leqniɛa. Ihi ass-a, abrid yenjer ulamma yessawen, yessa d isennan, tarwa n leḥlal ur tberru i ṭṭbel deg waman. Seg ucrured ɣer tikli !
S.M