Ilmend n tfaska tis snat n tmerrit n yidurar, amaray n tneɣlaft n tmerrit yerza-d ɣer Tubiret taggara n yimalas yezrin anda yeḥḍer i beddu n tfaska-a di Tikjda. Tama n usensu n CNLST, aṭas n yiqiḍunen i yettwaheggan anda, aṭas n tdukkliwin tidelsanin n temnaḍin yemxallafen n tmurt n Lezzayer xedment yiwet n temzikent ɣef waṭas n yisufar n yal tama yecban Chlef, Tipaza, Ain Defla, Tizi Ouzou, Médéa, Boumerdès… Dinna, lwali n Tubiret, Mass Maskri yerfed awal iwakken ad d-ibeggen azal n tmerrit di tudert n umdan d unerni n tmurt daɣ iwakken ad d-yessenɛet iberdan ilaqen i usnerni n uḥric-a. Dima deg usentel-a, tin yettmeslayen s yisem n CENEAP tejbed-d lwelha n wid yellan deg umkan ɣef lixṣas yellan deg uḥric n tmerrit, anda i d-tebder azal n xemsa n yimekwan i yeḥwaǧen ass-a afus n tallelt. Tebda kan s Tikjda anda i teḍmeɛ ad yennerni uxeddim yellan yakan tura deg-s, imi d nettat i d tamezwarut acku tekseb ttawilat iwulmen, terna-d Tala Rana yeqqimen akka tura d lexla. Ur tettu ara iwakken ad d-tebder daɣ Ḥemmam Ksana yettwasnen s waman-is iɣer ttruḥun acḥal n yimuḍinen, tiẓgi n Errich akked Sour El Ghozlane ikesben agerruj deg yidles aqbur.
S. M