Yiwen wass deg wussan n Ṛebbi, yiwet n temγart truḥ ar lexla a d-tezdem isγaṛen, mi tesni tazdemt-nni ulac win ara s-tt-id-isbibben acku meqqret u ẓẓayet, tebda t-ttnaγ yid-s tettemεentar iffeγ-d waγzen si ger ṭjuṛ, dγa tefqe&epsilon,; inṭeq γur-s inna-as:
-Ur ttagad a tamγart, d acu akka txedmeḍ dagi weḥd-m, di tezgi lawan-agi?
Terra-as temγart: -Annaγ a mmi aql-i la zeddmeγ isγaṛen.
Inna-as waγzen: -Maca tirint-agi n yisγaṛen meqqret!
Tamγart: -A mmi ad ttfaraṣeγ uqbel adfel.
Inna-as waγzen: -Ihi ur ttxemmim ara, eyya a men-sbibbeγ tirint-agi.
Tamγart: -Tanemirt a mmi a k-yefk Ṛebbi lxiṛ.
Iεawen-itt, icudd-as-tt, inna-as: -Ruḥ di laman.
Waγzen itbeε-itt-id zdefir, amar ad teγli neγ a tt-yaγ kra, akken tekcem s axxam wallant-ett teslatin-is am wakken tefqe&epsilon,; nnant-as: -Acu akka a yemma tamγart aql-ikem tkefneḍ?
Tamγart: -Annaγ a yessi mačči d Ṛebbi iyi-iselken?
Nnant-as: -Acu illan?
Netta waγzen si beṛṛa la d-ismeḥsis, ula d netta iwhem d acu iḍran!
Tamγart: -Annaγ a tullas mlaleγ-d d yiwen n lxelq di teẓgi, irra-yi-d tirint, qrib id-rriγ afwad-iw.
Tullas: -Acimi?
Tamγart: -Ay ttfuḥu uqemmuc-is am lmeyyet, ifassen-is d isufa, iḍaṛṛen-is d isegra, lḥasul d waγzen.
Mi isla waγzen i yimeslayen-agi, irra-d nnehta gar-as d yiman-is, isḥassef iṣubb γer teẓgi. Azekka-nni tamγart tṣubb γer teẓgi, tebda tzeddem, tuqqem tirint am tin akken n lfayet, teqqaṛ-as: -A Ṛebbi ger-iyi-d argaz-nni n yiḍelli.
Isla-d waγzen iffeγ-d.
Tamγart: -Mṛeḥba yis-k ay argaz llεali.
Waγzen: -Mṛeḥba a tucbiḥt.
Tamγart: -Ad cebḥen wussan-ik, lukan ad id-terreḍ tirint-agi am yiḍelli?
Waγzen: -Am tt-id-rreγ maca s cceṛt.
Tamaγart: -D lxiṛ.
Waγzen: -Tella γur-m tqabact?
Tamγart: -Tella.
Waγzen: -Ihi wwet-iyi s lğehd-im s tqabact-agi inem γer twenza.
Tamγart: -Annaγ a mmi, amek ara k-wwteγ?
Inna-as: -Nniγ-am wwet-iyi-d.
Si tuggdi-nni teṭṭef taqabact tewwet-it yuγal ala idammen.
Inna-as: -Tura ax amen-εebbiγ tirint-im.
Iεebba-as-d tirint truḥ-d s tergigit. Mi id-tewweḍ s axxam terra-tt ala i nnehtat d imeṭṭi, wa as-iḥkun taqsiḍt wa as-irun!
Teqqar-as: -Annaγ a yessi annaγ a tarwa ur tefhimeγ ara lxelq d-iḍelben a t-wwteγ s tgelzimt.
Waγzen irra leḥsab i temsirt. Ruḥ a zzman arwaḥ a zzman tamγart teḥwağ isγaren truḥ γer lexla am tannumi, taf-n dinna waγzen tenna-as: -D agi i telliḍ? Ur k-yuγ wara? Annaγ a mmi teḥliḍ? Ur fhimeγ ara…!
Inna-as waγzen : -A tamγart tecfiḍ γef umḍiq γer d iyi-tewteḍ s tqabact?
Tamγart: -Cfiγ a mmi.
Waγzen: -Muqqel ziγ ma ḥliγ?
Tamγart tmuqqel, tenna-as: -Teḥliḍ a mmi lḥemdu lleh ula d ccama ulac.
Waγzen: -Twalav ula d ccama ulac ulamma lğerḥ-nni meqqer, besseḥ tjarḥeḍ-iyi tikkelt mazal afeddix d ameqran, u mazal ur iḥli-ara.
Tamγart: -A mmi melmi k-jerḥeγ?
Inna-as: -Asmi akken im-xdemeγ lxiṛ tikkelt tamenzut, tagarra a t-hedreḍ fell-i lmuḥal, ihi:-“ yir lğerḥ iqqaz iḥellu, yir awal iqaz irennu ”.
Ifka-as tiγrit inγa-tt.
Win itellin imi-s aṭṭas a s-kecmen yizan, amarezg n win iṭṭfen imi-s neγ ad ihder kan ayen iwulmen.
Yeḥya Yanes.